तानसेन । सिद्धार्थ राजमार्गको पाल्पा बुटवल सडकखण्डको रामापिथेकस पार्क ड्याम साइट नाग मन्दिर नजिकै गुडिरहेको जीपमाथि ढुंगा खस्दा तीनजना घाइते भएका छन् ।
बुटवलबाट पाल्पातर्फ आउँदै गरेको लु २ च २८४९ नम्बरको सोमबार बिहान करिब साढे ६ बजेतिर जीपमाथि ढुंगा खस्दा तीनजना घाइते भएका हुन ।
घाइते हुनेहरूमा पूर्वी नवलपरासी नवलपुर त्रिवेणी गाउँपालिका -७ का ३२ वर्षीय जीप चालक विवेक कार्की, रुपन्देही सुद्धोधन गाउँपालिकाका २४ वर्षीय जीप सहचालक विवेक कार्की र तानसेन नगरपालिका -१४ का ४० वर्षीय दिलिप न्यौपाने रहेको दोभान प्रहरी चौकीका प्रहरी जवान सुसान्त सुनारले बताए ।
घाइते तीनैजनाको लुम्बिनी प्रादेशिक अस्पताल बुटवलमा उपचार भइरहेको छ । उनीहरूको स्वास्थ्य अवस्था सामान्य रहेको प्रहरीले जनाएको छ । उनीहरू तानसेन अर्गलीका न्यौपानेले बुटवलबाट टिन र फलाम लगायतका सरसमान लिएर अर्गलीतर्फ जाँदै थिए ।
ढुंगा लागेर जीप कच्याककुचुक भएको छ । जीपको अगाडिको भाग पूर्णरुपमा क्षति भएको छ । सडकमा खसेको ढुंगा पन्छाएर सडक यातायात सुचारु गरिएको पाल्पा प्रहरीले जनाएको छ ।
प्रकाशित मिति : २२ श्रावण २०८०, सोमबार १ : ४३ बजे
प्रतिक्रिया