पाकिस्तानले भारतमा विश्वकप नखेल्ने

एजेन्सी । पाकिस्तान आइसिसी एकदिवसीय विश्वकप खेल्न भारत नजाने सम्भावना देखिएको छ । दुई देशबिचको आन्तरिक राजनीतिको कारण पाकिस्तानले भारतमा विश्वकप नखेल्ने सम्भावना रहेको छ । पाकिस्तानले विश्वकपका खेलहरु बंगलादेशमा खेल्न सक्ने बताईएको छ ।

यसअघि भारतले एसिया कप खेल्न पाकिस्तान नजाने औपचारिक घोषणा गरेको थियो । एसिया कप आगमी सेप्टेम्बरमा पाकिस्तानमा हुँदैछ । भारतले एसिया कपका खेलहरु तटस्थ भूमि (नेचुरल भेन्यू) मा खेल्ने बताईएको छ ।

पाकिस्तानले पनि विश्वकप भारतमा नखेलेर बंगलादेशमा खेल्ने छलफल सुरु गरेको छ । पाकिस्तानले एसिया कपकै मोडलमा विश्वकप खेल्ने योजना बनाएको बताईएको छ । दुई साताअघि दुबईमा भएको आइसिसीको बोर्ड बैठकमा यस विषयमा छलफल भएको थियो ।

आइसिसीको बोर्ड बैठकमा पाकिस्तान र भारत दुबैले एकअर्काको देशमा नखेल्ने बताएका थिए । यहि बिषयमा केन्द्रित रहेर बैठकमा एसिया कप र विश्वकप एजेन्डाको रुपमा छलफल भएको थियो। बैठकमा विकल्पको रुपमा बंगलादेश प्रस्ताव गरिएको छ ।

भारत पाकिस्तानमा एसिया कप खेल्न नजादा २०२५ को च्याम्पियन्स ट्रफीमा असर पर्ने अनुमान गरिएको छ । पाकिस्तानले २०२५ फेब्रुअरीमा च्याम्पियन्स ट्रफी आयोजना गर्दैछ ।

पाकिस्तानले २०१८ मा पनि एसिया कप आयोजनाको अधिकार पाएको थियो । तर, भारतको कारण एसिया कप युएईमा भएको थियो । एसिया कप खेल्न भारत पाकिस्तान नगएमा पाकिस्तान पनि विश्वकप खेल्न भारत नजाने उच्च सम्भावना छ ।

प्रकाशित मिति : २० चैत्र २०७९, सोमबार  १२ : ५५ बजे