काठमाडौँ । जिल्ला अदालत धनुषाले धनुषाका दिलीप महतोको हत्यामा संलग्न ३ जनालाई दोषी ठहर गरेको छ । अदालतले दिलीप महतोको हत्या गर्ने विपिन महतो, जितेन्द्र महतो र मुनीन्द्र महतोलाई दोषी ठहर गरेको हो । जिल्ला न्यायाधीश चित्रबहादुर गुरुङको इजलासले उनीहरूलाई दोषी ठहर गरेको हो ।
अवैध उत्खननको विरोध गर्दा दिलिपको हत्या भएको अदालतको ठहर छ । विपिन चुरियामाई बालुवा प्रशोधन उद्योगका सञ्चालक हुन् । जितेन्द्र र मुनीन्द्र भने उक्त उद्योगका कामदारका रूपमा कार्यरत थिए । विपिन र मुनीन्द्रलाई दिलीपको मनशायपूर्वक हत्या गरेकोमा दोषी ठहराइएको हो भने जितेन्द्रलाई हत्याको मतियार भएकोमा कसुरदार ठहराइएको हो ।
विपिन र मुनीन्द्रलाई २५ वर्ष वा आजीवन कैदमध्ये कुनै एक सजाय हुनेछ भने जितेन्द्रलाई त्यसको आधा सजाय हुनेछ । आगामी फागुन १२ गते न्यायाधीश गुरुङले नै उनीहरूलाई सजाय निर्धारण गर्नुहुनेछ ।
घर अगाडिको औरही खोलाबाट भइरहेको ढुंगा, गिट्टी र बालुवाको अवैध उत्खननको विरोध गर्दा ओमप्रकाश महतो ९दिलीप० ले २०७६ पुस २५ मा ज्यान गुमाएका थिए । अनियन्त्रित उत्खननविरुद्ध आवाज उठाइरहेका दिलीपको चुरियामाई बालुवा प्रशोधन उद्योगका सञ्चालक र कामदारले हत्या गरेको अभियोग लागेको थियो । क्रसर उद्योग सञ्चालक विपिनकुमारले अवैध एवं अनियमित रूपमा बालुवा–गिट्टी उत्खनन गरेको भन्दै विरोध गर्न २०७६ पुस २५ गते बिहान ४ बजे दिलीप खोलामा पुगेका थिए तर उनी त्यहाँबाट जीवितै फर्किएनन् ।
उद्योग सञ्चालक विपिन तथा उनका कामदारहरू मुनिन्द्र र जितेन्द्रसहितका सात जनाले दिलीपलाई फलामको लिभर र पेचकसले शरीरका विभिन्न भागमा क्रूरतापूर्वक प्रहार गरेर हत्या गरेको सरकारी वकिलको दाबी छ । जिल्ला अदालतमा दायर गरिएको अभियोगपक्रमा आत्रमणपश्चात् बेहोस भएर ढलेका दिलीपलाई ना ७ ख ६४१३ नं। टिपरको पछाडि चक्काले टाउकोमा कुल्चाएर मारी सडक दुर्घटनाको रूप दिने प्रयास गरिएको उल्लेख छ ।
हत्याको अभियोग लागेका उद्योग सञ्चालक विनोद महतो र कामदारहरू सत्यनारायण महतो, शत्रुधन महतो र रोशनकुमार महतोले भने सफाइ पाएका छन् ।
प्रकाशित मिति : ३ फाल्गुन २०७९, बुधबार ५ : ५५ बजे
प्रतिक्रिया