पोखरा । पोखरा अन्तर्राष्ट्रिय विमानस्थल अङ्ग्रेजी नयाँ वर्षबाट सञ्चालनमा आउँदै छ ।
प्रधानमन्त्री शेरबहादुर देउवाले विमानस्थलको उद्घाटन गर्ने कार्यक्रम तय भएको छ । नागरिक उड्डयन प्राधिकरण कार्यक्रमको तयारीमा जुटिसकेको छ ।
तर, अहिलेसम्म विमानस्थलबाट कुन जहाजले पहिलो उडान भर्ने भन्ने निर्णय भएको छैन । यद्यपि विभिन्न कम्पनीले पहिलो उडानमा चासो देखाएका छन् । नेपाली र विदेशी हवाई कम्पनीले समेत चासो देखाएका प्राधिकरणले जनाएको छ ।
विमानस्थलबाट उडानका लागि भारतीय, चिनियाँ विमान कम्पनीका साथै थाइ एयर, जजिरा एअरवेजले चासो देखाएको पोखरा विमानस्थलका प्रमुख विक्रम गौतमले बताउनुभयो । विमानस्थलबाट नेपाली विमान कम्पनी बुद्ध एयर र हिमालय एयरलाइन्सले अन्तर्राष्ट्रिय उडान भर्न अनुमति मागेका छन् ।
पोखराका मेयर धनराज आचार्यले आफूसँग पनि विभिन्न ४ वटा विदेशी एयरलाइन्स कम्पनीले भेटेरै पहिलो उडानमा चासो दिएको बताउनुभयो । “मसँग ज्ञारेण्टी माग्नुभएको छ । केही आन्तरिक व्यवस्थापन हामीले मिलाउनुपर्ने भएको छ”, उहाँले भन्नुभयो, “४ वटा कम्पनीले मलाई नै भेटेर सहजीकरणको प्रस्ताव गर्नुभएको छ ।” खास गरी पोखराको ल्याण्डफिल साइट हटाउन नसक्दा अहिले बढी समस्या देखिएको छ ।
बुद्ध एयरले पोखरालाई हब बनाएर भारतका तीन प्रमुख सहरमा उडान भर्ने तयारी गरेको छ । बनारस, नयाँ दिल्ली र देहरादुनमा बुद्धले उडान भर्न लागेको हो ।
विमानस्थलमा क्यालिब्रेसन फ्लाइट समेत भइसकेको छ । प्रतिवेदन पाएपछि उडानका लागि थप सहयोग पुग्छ । क्यालिब्रेसन फ्लाइटका लागि थाइ एयर पोखरा आएको थियो ।
प्रकाशित मिति : १ पुस २०७९, शुक्रबार ७ : ५९ बजे
प्रतिक्रिया