सुर्खेत । कर्णालीका विभिन्न जिल्लामा बन्दी जीवन बिताइरहेका तीन सय ४८ कैदीबन्दीले मताधिकार पाएका छन् ।
आसन्न ४ मङ्सिरमा हुने प्रतिनिधिसभा र प्रदेशसभा निर्वाचनमा मताधिकार प्रयोग गर्न पाउने भएका हुन्।
फौजदारी कसुरको अभियोग लागेर कारागार पर्नुअघि फोटोसहितको मतदाता नामावली भरेकाहरूले मात्र मतदान गर्न पाउने कानुनी व्यवस्थाअनुसार कैदीबन्दीले मताधिकार प्रयोग गर्न पाउने भएका हुन् ।
सोहीअनुसार कर्णाली प्रदेश नौ जिल्लाका तीन सय ४८ जना कैदीबन्दीले मताधिकार पाएका हुन्। जुम्ला कारागारका एक सय सात कैदीबन्दीमध्ये १४ जनाले मतदान गर्न पाउने छन् । जुम्लामा मताधिकार पाएका १४ जना सबै पुरुष छन्।
कैदीबन्दीको मताधिकार प्रयोग गर्नका लागि कारागारमा अस्थायी मतदान व्यवस्थापन गरिएको जेलर विष्णुबहादुर महतले बताउनुभयो। उहाँका अनुसार कैदीबन्दीले समानुपातिकतर्फ मात्रै मतदान गर्न पाउने व्यवस्था छ।
डोल्पा जिल्ला कारागारका १४ जना कैदीबन्दीले प्रतिनिधिसभा तथा प्रदेश सभा सदस्य निर्वाचनमा मतदान गर्न पाउने भएका छन्। कारागारमा कैद भुक्तान गरिरहेका र डोल्पा जिल्लामै मतदाता नामावली भएका १४ जनालाई मतदान गर्ने व्यवस्था मिलाइएको जिल्ला निर्वाचन कार्यालयका निर्वाचन अधिकारी रामबहादुर सार्कीले जानकारी दिनुभयो
सुर्खेत कारागारका एक सय एक जना कैदीबन्दीले मतदान गर्न पाउने भएका छन्। कैदीबन्दीहरूका लागि कारागारमै अस्थायी मतदान केन्द्र तोकिएको प्रदेश निर्वाचन अधिकारी दुर्गा चालिसेले बताउनुभयो। उनीहरूले समानुपातिकतर्फको सङ्घमा मात्रै मत हाल्न पाउने भन्दै कारागारमै मतदान केन्द्रको व्यवस्था मिलाइने निर्वाचन अधिकारी चालिसेले बताउनुभयो।
दैलेख कारागारमा एक सय २६ जना कैदीबन्दी भए पनि ६३ जनाले मात्र सङ्घीय संसद् प्रतिनिधिसभा सदस्य पदका लागि समानुपातिकतर्फको मतपत्रमा मत दिन पाउने भएका छन्।
रुकुम पश्चिम कारागारबाट ६६ जना कैदी बन्दीको नाम निर्वाचन कार्यालयमा पठाइएको छ। रुकुम पश्चिम कारागारमा रुकुम पूर्वमा कारागार नभएका कारण रुकुम पूर्व जिल्लाका कैदीबन्दीलाई पनि राखिँदै आएको छ।
जिल्ला कारागार रुकुम पश्चिमका प्रमुख अकवीर घर्तीले निर्वाचनमा रुकुम पश्चिम र पूर्व गरी ६६ जना कैदीबन्दीले मतदान गर्न पाउने जानकारी दिनुभयो। कारागारमा रहेका एक सय २४ जना कैदीबन्दीमध्ये ६६ जना कैदीबन्दीले मात्र मताधिकार पाएका छन्।
जाजरकोट कारागारका ५२ जना कैदीबन्दी तथा थुनुवामध्ये ३२ जनाले मतदान गर्न पाउने जिल्ला कारागार प्रमुख चन्द्रबहादुर गिरीले बताउनुभयो।
कालिकोट कारागारका ५० जना कैदीबन्दीमध्ये २३ जनाले मतदान गर्न पाउने जिल्ला कारागार कार्यालयका प्रमुख नरबहादुर मिजारले जानकारी दिनुभयो।
त्यस्तै, सल्यान कारागारका १२६ जना कैदीबन्दीमध्ये १८ जनाले मताधिकार पाएको जिल्ला कारागार प्रमुख राजन कँडेलले बताउनुभयो । हुम्ला जिल्ला कारागारका १७ जना कैदीबन्दीले मतदान गर्न पाउने प्रमुख जिल्ला अधिकारी सरिता परियारले बताउनुभयो ।
प्रकाशित मिति : २७ कार्तिक २०७९, आइतबार ११ : ५६ बजे
प्रतिक्रिया