सर्लाहीको कर्मैयामा सहकारी प्रमुखमाथि गोली प्रहार गरेर लुटेरा फरार

सर्लाही ।​​​​​​​ सर्लाहीको कर्मैयास्थित मिलनचोकमा रहेको सगुन बचत तथा ऋण सहकारी संस्था हरिवनको सेवा केन्द्रका प्रमुखमाथि गोली प्रहार गरेर लुटेरा समूह फरार भएको छ ।

बुधबार बिहान साढे १० बजेतिर बागमती नगरपालिका–१, मिलनचोकमा रहेको बचत तथा ऋण सहकारी प्रमुख साजन कार्कीमाथि लुटेरा समूहले गोली प्रहार गरेको हो । तीनजनाको समूहमा आएका लुटेराले सेवा केन्द्रको कार्यालयभित्र पसेर कार्कीलाई पैसा दिन भन्दै धम्क्याएका थिए ।

कार्कीले प्रतिकार गर्नेबित्तिकै लुटेरा समूहले चार गोली प्रहार गरेको उहाँको भनाइ छ । गोली प्रहार गरेपछि लुटेरा समूह भारतीय नम्बर प्लेटको एउटै मोटरसाइकलमा चढेर दक्षिणतर्फ भागेका छन् । 

कार्कीको तिघ्रा, कुम, ढाड र कोखामा गोली लागेको छ । उनको सर्लाहीमा उपचार हुन नसकेपछि काठमाडौं पठाइएको छ । 

प्रकाशित मिति : २ कार्तिक २०७९, बुधबार  १ : २१ बजे