देश र समाज बदल्न समर्पणको खाँचो : महासचिव पोखरेल

बैतडी । नेकपा (एमाले)का महासचिव शङ्कर पोखरेलले आगामी निर्वाचनलाई एउटा नियमित प्रक्रियाका रूपमा मात्र होइन, समाज बदल्ने अभियानका रूपमा लिई एकताबद्ध भई जुट्न पार्टी पङ्तिलाई आग्रह गर्नुभएको छ ।

जसरी राजनीतिक परिवर्तनका लागि समर्पण गरियो त्यसरी नै देश बदल्ने अभियानका लागि पनि समर्पण आवश्यक रहेको बताउँदै महासचिव पोखरेलले ‘देश बदल्ने भनेको समाज बदल्ने हो, समाज बदल्नका लागि आगामी निर्वाचनमा पार्टीलाई विजयी बनाउन सङ्गठित र एकताबद्ध भई लाग्नुपर्छ भन्नुभयो ।

उहाँले आगामी निर्वाचनलाई सामान्य रूपमा नलिन स्थानीय नेता कार्यकर्तालाई आग्रह गर्नुभयो । महासचिव पोखरेलले एक पार्टी सदस्यले नयाँ दुई भोट वृद्धि र पुराना पाँच भोटको संरक्षण गरेको अवस्थामा मङ्सिर ४ पछि एमालेको नेतृत्वमा सरकार बन्ने बताउनुभयो ।

बैतडीको पाटनमा बिहीबार आयोजित कार्यकर्ता प्रशिक्षण भेलालाई सम्बोधन गर्दै महासचिव पोखरेलले मङ्सिरपछि पनि पाँच दलीय गठबन्धनको सरकार बन्ने अवस्था आयो भने देशको भविष्य अन्धकार हुने बताउनुभयो ।

उहाँले गठबन्धन सरकारको एक वर्षको कार्यकालमा देश अधोगतितर्फ गइरहेको आर्थिक सूचकाङ्कहरूले देखाइरहेको तथ्य प्रस्तुत गर्दै देशको भविष्यप्रति चिन्ता व्यक्त गर्नुभयो ।

स्थानीय निर्वाचनमा गठबन्धनमा रहेका दलहरूले सत्ताको दुरुपयोग गरी मतदाता प्रभावित गरेको अनुभव सुनाउँदै महासचिव पोखरेलले आगामी निर्वाचनमा मत सुरक्षाका लागि हरेक बुथमा युवा दस्ता तैनाथ गर्नुपर्ने हुँदा तयारी गर्न निर्देशन दिनुभयो ।

महासचिव पोखरेलले भन्नुभयो– “मत वृद्धि र मत सुरक्षाको योजना सफल बनाई आगामी निर्वाचनपछि एमालेले बहुमतका साथ सरकारको नेतृत्व गर्नुपर्छ ।”

एमालेको सरकार बनेपछि वृद्ध भत्ता पाँच हजार पुर्‍याउने भन्दै उहाँले एमालेका अध्यक्ष मनमोहन अधिकारीको पालामा एक सय रुपियाँबाट सुरु भएको वृद्ध भत्ता एमालेकै पालामा चार हजार पुगेको बताउनुभयो ।

महासचिव पोखरेलले देश बनाउने शक्ति एमाले मात्र भएकाले सबै नेपाली जनतालाई एमालेको झण्डामुनि गोलबद्ध हुन आह्वान गर्नुभयो । उहाँले राष्ट्रवादी शक्ति एमालेका कारण एसपीपी सम्झौता रोकिएको बताउनुभयो । गठबन्धन सरकारले देश र जनताका लागि काम गर्न नसक्ने उहाँको भनाई थियो ।

एमाले अध्यक्ष केपी शर्मा ओलीको नेतृत्वमा चुच्चे नक्सा संसद्बाट पास भएर आएपछि अहिलेको सरकारले चुच्चे नक्सा हटाउँदै हिँडेको बताउनुभयो ।

सुदूरपश्चिमको विकासका बारेमा महासचिव पोखरेलले भन्नुभयो–“महाकाली करिडोर, मध्य पहाडी लोक मार्गको सुरुवात र सुदूरपश्चिमका आठ वटा विमानस्थल कालोपत्रेको काम एमालेको पालामा भएको हो ।”

प्रशिक्षण कार्यक्रममा नेकपा माओवादी केन्द्र र नेकपा एकीकृत समाजवादीबाट ६० जना नेता कार्यकर्ता एमालेमा प्रवेश गरेको नेकपा (एमाले) बैतडीका अध्यक्ष सुरेन्द्र पालले जानकारी दिनुभयो ।

कार्यक्रममा पार्टी सचिव लेखराज भट्टले वर्तमान गठबन्धन सरकारले देशलाई आर्थिक रूपमा धराशायी पार्दै लगेको बताउनुभयो ।

प्रशिक्षण कार्यक्रममा सुदूरपश्चिम प्रदेश अध्यक्ष दामोदर भण्डारी, केन्द्रीय सदस्य पुरन दयाल, लिलाधर भट्ट तथा बुधवार महेन्द्रनगरमा आयोजित कार्यक्रममा समाजवादीबाट एमालेमा समाहित हुनुभएका नेताहरू विक्रम बहादुर शाही, अशोक चन्द, तारा लामा तामाङ लगायत सहभागी हुनुहुन्थ्यो ।