धनगढी । धनगढीको ६ लेन सडक खण्डमा फेला परेको शङ्कास्पद बस्तुलाई नेपाली सेनाको बम डिस्पोजल टोलीले निष्क्रिय पारेको छ ।
त्यस्तै गोदावरी नगरपालिका–६ हरैयामा प्रेसर कुकुर जस्तो देखिने शङ्कास्पद बस्तु फेला परेको र घटनास्थलमा प्रहरी टोली खटिएको जिल्ला प्रहरी कार्यालय कैलालीका डिएसपी वेद जोशीले जानकारी दिनुभयो ।
उक्त शङ्कास्पद बस्तु निष्क्रिय पार्न नेपाली सेनासँग समन्वय भइरहेको प्रहरीले जनाएको छ ।
सरकारसँग भएको तीन बुँदे सहमति कार्यान्वयनको माग गर्दै नेत्र विक्रम चन्द विप्लव नेतृत्वको नेकपाले बन्द आह्वान गरेको दिन आज कैलालीमा शङ्कास्पद बस्तु भेटिएको हो ।
यसैबिच बन्दका कारण कैलालीको जनजीवन प्रभावित भएको छ । बन्दले गर्दा धनगढीबाट पूर्वी तथा पहाडी रुटमा चल्ने सार्वजनिक यातायातका सवारी साधन चल्न सकेका छैनन् ।
यस्तै बजार, व्यवसाय, शैक्षिक संस्था बन्द रहेका छन् । धनगढीमा हलुका सवारी साधन फाटफुट चलेका छन् ।
बन्दलाई मध्यनजर गर्दै जिल्लाभर सुरक्षा व्यवस्था थप सुदृढ पारिएको र सुरक्षा संवेदनशीलता हरेर सुरक्षाकर्मी परिचालन गरिएको प्रहरीले जनाएको छ ।
प्रकाशित मिति : ७ भाद्र २०७९, मंगलबार ९ : ४७ बजे
प्रतिक्रिया