उदयपुर । उदयपुरको बेलका नगरपालिकाको डुम्रिबोटेबाट सप्तकोसीको बाढी पश्चिमतर्फ पसेसँगै ५ वटाभन्दा बढी मानवीय बस्ती उच्च जोखिममा परेका छन् ।
सप्तकोशीले पश्चिमतर्फको भागमा निरन्तर कटान गर्दा बेलका नगरपालिकाको १, २, ३, ८ र ९ वडाको धौरीटापु, श्रीलङ्का टापु, भागलपुर, करैया, तपेश्वरीलगायत बस्ती उच्च जोखिममा परेका हुन ।
पूर्वी पहाडमा लगातारको वर्षात्सँगै कोसी नदीमा आएको बाढीले पछिल्लो समय कटान तीव्र पारेसँगै पश्चिम तटीय क्षेत्रमा नदी मानव बस्तीमा पसेको र सो क्षेत्रका सर्वसाधारणलाई सुरक्षित स्थानतर्फ जानका लागि सूचना जारी गरिएको नगर प्रमुख अशोक कार्कीले बताउनुभयो ।
उहाँका अनुसार बुधवार बिहानसम्म करिब २५ मिटर कटान गरेर कोसीको भँगालो पश्चिम पसेको छ भने कटानको क्रममा जारी रहेकाले झन्डै ३ सय मिटर कटान गरेर जाने सम्भावना भएको हुनाले धारै परिवर्तन हुन सक्ने खतरामा पनि उत्तिकै रहेको भन्दै स्थानीयलाई सुरक्षित स्थानतर्फ जान अनुरोध गरिएको कार्कीले जानकारी दिनुभयो।
प्रकाशित मिति : १८ श्रावण २०७९, बुधबार १० : ०३ बजे
प्रतिक्रिया