काठमाडौँ उपत्यकामा अनलाइनबाट मतदाता नामावली दर्ता सुरु

​​​​​​​काठमाडौँ  । निर्वाचन आयोगले फोटोसहितको मतदाता नामावली सङ्कलनको कार्यलाई सरलीकरण गर्दै अनलाइनबाट नै फाराम भरी मतदाता नामावली दर्ता गर्न सकिने व्यवस्था गरेको छ । 

आयोगले उक्त कार्य नमुना परियोजनाका रूपमा काठमाडौँ उपत्यकाका काठमाडौँ, भक्तपुर र ललितपुर मङ्गलवारदेखि सुरु गरेको हो  । 

फोटोसहितको मतदाता नामावलीमा हालसम्म नाम दर्ता नगरेका नेपाली नागरिकले अनलाइनबाट फाराम भर्न चाहेमा निर्वाचन आयोग, नेपालको वेबसाइट www.election.gov.np मा गई व्यक्तिगत विवरण भरी जिल्ला निर्वाचन कार्यालय (हाललाई काठमाडौँ उपत्यकाका तीन जिल्ला) मा अनलाइनबाटै पेस गर्न सकिनेछ । 

सोपश्चात् अनलाइन फाराममा उल्लिखित सङ्केत नं सहितको प्रिन्ट कपी र आवश्यक अन्य प्रमाण कागजात लिएर फोटो खिच्न र औँठा छाप दिन सम्बन्धित जिल्ला निर्वाचन कार्यालयमा सम्पर्क राख्न जानुपर्ने आयोगका प्रवक्ता शालिग्राम शर्मा पौडेलद्वारा जारी विज्ञप्तिमा जनाइएको छ ।  

प्रकाशित मिति : २९ असार २०७९, बुधबार  ८ : ०९ बजे