काठमाडौं । कैलाली, बाँके, मोरङ र कास्कीमा अवैध लागूऔषधसहित ७ जनालाई प्रहरीले पक्राउ गरेको छ ।
कैलालीको गोदावरी नगरपालिका–५ गेटाबाट १४ ग्राम ९२७ मिलिग्राम अवैध लागूऔषध खैरो हेरोइन जस्तो देखिने पदार्थ सहित दुई जनालाई मंगलबार प्रहरीले पक्राउ गरेको छ ।
पक्राउ पर्नेहरूमा सोही नगरपालिका–१ बस्ने २१ वर्षीय नबिन सिंह मडै र सोही नगरपालिका–१२ बस्ने २८ वर्षीय जिवन खत्री रहेका छन् ।
इलाका प्रहरी कार्यालय मालाखेतीबाट खटिएको प्रहरीले उनीहरु चढेको मोटरसाइकल जाँच गर्ने क्रममा सिट मुनी तीनवटा पोका बनाई राखेको अवस्थामा उक्त पदार्थ सहित फेला पारी दुवै जनालाई पक्राउ गरेको हो ।
बाँकेको नरैनापुर गाउँपालिका–६ दोन्द्रा बस्ने ५० वर्षीया अनिता मौर्या सहित २ जनालाई करिब १८५ केजी गाँजा सहित मंगलबार प्रहरीले पक्राउ गरेको छ ।
इलाका प्रहरी कार्यालय भगवानपुरबाट खटिएको प्रहरीले अनिता मौर्या सहित ४ जनाको घर तलासी गर्दा गहुँको भुसभित्र लुकाई राखिएको अवस्थामा उक्त गाँजा फेला पारी उनीहरूलाई पक्राउ गरेको हो । हाल फरार अन्य २ जनाको प्रहरीले खोजी गरिरहेको छ ।
मोरङको विराटनगर महानगरपालिका–१२ महेन्द्र मोरङ क्याम्पस अगाडिबाट ५ ग्राम ७ सय मिलीग्राम ब्राउन सुगर जस्तो देखिने पदार्थ सहित दुई जनालाई प्रहरीले पक्राउ गरेको छ । पक्राउ पर्नेमा सोही महानगरपालिका–६ बस्ने ४० वर्षीय नारायण महत्तो समेत दुई जना छन् । उनीहरुलाई मंगलबार साँझ प्रहरीले पक्राउ गरेको हो
भारतबाट नेपालतर्फ साईकलमा आउँदै गरेका महत्तोलाई प्रहरी चौकी बखरीबाट खटिएको प्रहरीले जाँच गर्ने क्रममा उक्त पदार्थ सहित फेला पारेपछि उनी समेत दुवै जनालाई पक्राउ गरेको हो ।
कास्कीको पोखरा महानगरपालिका–३० पावरहाउस चोकबाट करिब एक केजी गाँजा सहित एक जनालाई प्रहरीले मंगलबार पक्राउ गरेको छ । पक्राउ पर्नेमा सोही महानगरपालिका–५ प्रस्याङ बस्ने गोरखा भिमसेन गाउँपालिका–१ घर भएका २१ वर्षीय सुजन परियार रहेका छन् ।
काठमाडौंबाट पोखरातर्फ आउँदै गरेको ग.१ ख २९५९ नम्बरको बसलाई वडा प्रहरी कार्यालय गगनगौडाबाट खटिएको प्रहरीले जाँच गर्ने क्रममा बसमा सवार सुजनलाई उक्त गाँजा सहित फेला पारी पक्राउ गरेको हो ।
प्रकाशित मिति : १५ असार २०७९, बुधबार १ : ४७ बजे
प्रतिक्रिया