खोटाङ । मोटरसाइकलको ठक्करबाट घाइते हुनुभएका राप्रपाका नेता जीवनकुमार श्रेष्ठको मृत्यु भएपछि मोटरसाइकल चालक र धनीविरुद्ध सवारी कर्तव्य ज्यान अन्तर्गत जाहेरी परेको छ । प्रदेश १–०५–००१ प ६८३७ नम्बरको मोटरसाइकको ठक्करबाट घाइते हुनुभएका श्रेष्ठको आइतबार निधन भएको हो । दिक्तेल रुपाकोट मझुवागढी नगरपालिका–५ लफ्याङका १७ वर्षीय अभिशेष राईले चलाएको मोटरसाइकलले उहाँलाई ठक्कर दिएको थियो । मोटरसाइकलका धनी भने उदयपुरको त्रियुगा नगरपालिका–१ का सविन राई हुन् । उनीहरू दुवैविरुद्ध जिल्ला प्रहरी कार्यालयमा सवारी कर्तव्य ज्यान अन्तर्गतको जाहेरी दर्ता भएको हो ।
आफन्तसहित जिल्ला प्रहरी कार्यालय पुग्नुभएका मृतक श्रेष्ठका अन्तरे भाई रुद्रकुमार श्रेष्ठले सोमबार जाहेरी दिनुभएको हो । उहाँहरूले घटनाको सत्यतथ्य छानबिन र दोषीमाथि कारबाहीको माग गर्नुभएको छ ।
२० जेठमा दिक्तेल रुपाकोट मझुवागढी नगरपालिका–१ दिक्तेलको रत्नपार्क जिरोप्वइन्टबाट बजारभित्र जाँदै गरेको मोटरसाइकलले सपिङ कम्प्लेक्स अगाडि श्रेष्ठलाई ठक्कर दिँदा गम्भीर घाइते हुनुभएको थियो । उहाँको न्युरो अस्पतालमा उपचारका क्रममा २२ जेठमा निधन भएको थियो । तीव्र गतिमा रहेको मोटरसाइकलले पछाडिबाट ठक्कर दिएपछि श्रेष्ठको टाउको र छातीमा गहिरो चोट लागेको थियो ।
श्रेष्ठ राप्रपा खोटाङका निवर्तमान अध्यक्ष हुनुहुन्थ्यो । करिब १५ वर्ष पार्टीको जिल्ला अध्यक्षको भूमिका निर्वाह गर्नुभएका उहँ भर्खरै सम्पन्न स्थानीय तहको निर्वाचनमा दिक्तेल रुपाकोट मझुवागढी नगरपालिकामा मेयरका उम्मेदवार हुनुहुन्थ्यो ।
प्रकाशित मिति : २३ जेष्ठ २०७९, सोमबार ३ : ५१ बजे
प्रतिक्रिया