गोरखा । गोरखाको धार्चेमा बनिरहेको एक अस्पतालको ढलानका लागि हेलिकप्टर प्रयोग गरिएको छ । धार्चे गाउँपालिका– ३ स्थित खोर्लाबेँसीमा १५ शय्याको सामुदायिक अस्पताल निर्माणका लागि हेलिकप्टर प्रयोग गरी ढलान गरिएको हो ।
करिब तीन करोड लागतमा बनिरहेको उक्त अस्पतालका लागि गाउँपालिकाको ४० र छायाँ नेपाल संस्थाको ६० प्रतिशत लगानी छ ।
छायाँ नेपालका परियोजना प्रबन्धक सन्तोष सिलवालका अनुसार उक्त अस्पताल निर्माणका लागि नेपालमा नै पहिलोपटक ‘स्विङ फ्लाइट्स’ प्रविधि प्रयोग गरिएको हो । उहाँले यो प्रविधि अनुसार हेलिकोप्टरबाट सिमेन्ट, गिटी, बालुवा घोलेर तयार गरिएको ‘मसला’ बोकेर अस्पतालको भुइँतला ढलान गरिएको जानकारी दिनुभयो ।
जेठ १९ गते सिम्रिक एयरका दुईवटा हेलिकप्टरबाट अस्पतालका लागि ‘मसला’ बोकेर ढलान गरिएको उहाँले जानकारी दिनुभयो । छायाँ नेपाल र सिम्रिक एयरसँगको सहकार्यमा निःशुल्क दुईवटा हेलिकोप्टरले ५० ट्रिपभन्दा बढी ‘मसला’ ओसारेको सिलवालले जानकारी दिनुभयो।
सडक सञ्जाल नपुगेको दुर्गम ठाउँमा हेलिकोप्टरबाट तयारी निर्माण सामग्री (मसला) लैजान कत्तिको सहज हुन्छ भन्ने परीक्षणका लागि पनि हेलिकोप्टर प्रयोग गरिएको हो ।
हेलिकोप्टरको प्रयोग सिम्रिक एयरले सामाजिक उत्तरदायित्वअन्तर्गत सहयोग गरेको संस्थाले जनकारी दिएको छ ।
अहिले अस्पतालको १ र २ नम्बर ब्लकको भुइँतला ढलान र गाह्रो लगाउने काम भइसकेको छ भने ब्लक नम्बर ३ र ४ को भुइँतला ढलान सम्पन्न गरी गाह्रो लगाउने काम भइरहेको छ ।
प्रकाशित मिति : २२ जेष्ठ २०७९, आइतबार २ : ०९ बजे
प्रतिक्रिया