जनकपुरधाम । पेट्रोलियम पदार्थमा गरिएको मूल्यवृद्धि फिर्ताको माग गर्दै जनकपुरधाममा युवाहरले प्रदर्शन गरेका छन् ।
बुधबार युवाहरूले जानकी चोकमा मोटरसाइकल र ग्याँस सिलिण्डर सडकमा राखेर प्रदर्शन गरेका हुन् । उनीहरूले प्रधानमन्त्री शेरबहादुर देउवा, उद्योग, वाणिज्य तथा आपूर्तिमन्त्री दिलेन्द्रप्रसाद बडूप्रति आक्रोश व्यक्त गर्दै नाराबाजी गरे ।
निरन्तर पेट्रोलियम पदार्थको मूल्यवृद्धि गरी सरकारले जनतालाई दुःख दिने काम गरेको उनीहरूको आरोप छ । आफूलाई लोकतन्त्रको पक्षधर बुझ्ने गठबन्धन सरकारले जनतालाई महँगीको मारमा धकेलेको भन्दै अब जनता प्रतिकार उत्रिने पनि युवाहरूले चेतावनी दिए ।
पेट्रोलियम पदार्थको मूल्यवृद्धिको असर अन्य क्षेत्रमा पर्ने भएकाले तत्काल मूल्यवृद्धि फिर्ता लिन युवा ले माग गरे । तत्काल मूल्यवृद्धि फिर्ता नलिइए आफूहरू कडा आन्दोलनमा उत्रिनेसमेत उनले चेतावनी दिए ।
सरकारले गत आइतवार रातिबाट लागू हुने गरी प्रतिलिटर १० रुपैयाँका दरले पेट्रोलियम पदार्थको मूल्यवृद्धि गरेको थियो । अहिले पेट्रोल प्रतिलिटर १८०, डिजेल र मट्टितेल १६३, आन्तरिक हवाईमा १६६, खाना पकाउने ग्याँसको मूल्य प्रतिसिलिण्डर २०० रुपैयाँले बढाएर १८ सय रुपैयाँ पुर्याएको छ ।
प्रकाशित मिति : ११ जेष्ठ २०७९, बुधबार ६ : ०७ बजे
प्रतिक्रिया