महोत्तरी । बर्दिबासमा मतपेटिका नखोल्दै मत परिणाम घोषणा गरिएको भेटिएको छ। तीन दिन अगाडि बर्दिबास नगरपालिका– ८को मत परिणाममा निर्वाचन अधिकृत भूपेन्द्र सापकोटाले माओवादी केन्द्रबाट शमशेरसिंह लामा विजयी भएको घोषणा गर्नुभएको थियो।
मतगणनामा धाँधली भएको एमालेले आरोप लगाइरहेका वेला सिल नै नतोडिएको मतपेटिका भेटिएपछि निर्वाचन आयोगमाथि नै प्रश्न खडा भएको छ।
निर्वाचन अधिकृत सापकोटाले माओवादी केन्द्रबाट लामाले ८ मतले उछिन्दै एमालेका रुद्र किङरिङलाई पराजित गरेको घोषणा गर्नुभएको थियो ।यता निर्वाचन अधिकृतको कार्यालय बर्दिबासले भने स्टोरमा राख्ने क्रममा त्रुटि भएको जनाएको छ ।
`वडा न.८ को मतपेटिका मतदान अधिकृतले दिएको जानकारीअनुसार नै रुजु गरियो र सबै मतपेटिका एकै ठाउँमा राखेका थियौ,´ सहायक निर्वाचन अधिकृत सर्मिला तामाङले भन्नुभयो ।
उहाँकाअनुसार सर्वदलीय बैठक राखेर यसको समाधान खोजिने छ ।
फूल माला र अबिर सहित विजय जुलुस मनाइसकेको माओवादी भने निर्वाचन आयोगको त्रुटिलाई स्विकार्ने अवस्थामा छैन ।
माओवादी केन्द्र प्रदेश कमिटी सदस्य राजन ढुंगनाले भेटिएको मतपेटिकालाई खोलेर पुनः मतगणना गर्नु कुनै अर्थ नरहेको जिकिर गर्नुभयो ।
‘निर्वाचन आयोगले माओवादी केन्द्रका शमशेरसिंह विजयी भएको घोषणा गरेसँगै निर्वाचन आयोगले समेत त्यसलाई प्रमाणीकरण गरिसकेको छ अनि मतपेटिका खोलेर मतगणना गर्नुको के नै अर्थ रह्यो र ? ´ ढुङ्गानाले भन्नुभयो।
निर्वाचन अधिकृतको कार्यालय बर्दिबासले भने मानवीय भूललाई स्वीकार गरेर समाधानको निकास निकाल्नेमा आफू विश्वस्त रहेको जनाएको छ । बर्दिबास नगरपालिकाको अन्तिम मत परिणाम आउन बाँकी नै छ ।
वडा नम्बर ९ को मतगणना सकिएपछि अन्तिम मतपरिणाम सार्वजनिक हुने पर्खाइमा बसेका सर्वसाधारण वडा नम्बर ८ विवाद नसुल्झिएसम्म प्रतीक्षामा रहनुपर्ने देखिएको छ ।
निर्वाचन आयोगले घोषणा गरेको वडा नम्बर ८ को मत परिणामअनुसार माओवादी केन्द्रका शमशेरसिंह लामाले ७५३ मत प्राप्त गर्नुभएकोछ भने उहाँका निकटतम प्रतिद्वन्द्वी रुद्र किङरिङले ७४४ मत प्राप्त गर्नुभएको छ नखोलिएको मतपेटिकामा अझै ८० देखि ८५ मतपत्र हुनसक्ने आशङ्का गरिएको छ ।
प्रकाशित मिति : ५ जेष्ठ २०७९, बिहिबार २ : १० बजे
प्रतिक्रिया