इलाम । गठबन्धनको उम्मेदवारलाई पराजित गर्दै इलामको माङसेबुङ गाउँपालिकामा नेकपा एमालेले जितेको छ । गाउँपालिका अध्यक्षमा हेमन्त राई निर्वाचित हुनुभएको हो ।
राई ३ हजार ८१८ मतसहित विजयी हुँदा गठबन्धनका उम्मेदवार डिकेन्द्र इदिङ्गोले ३ हजार ३९५ मत पाए । पराजित डिकेन्द्र निवर्तमान गाउँपालिका अध्यक्ष हुनुहुन्छ ।
यसअघिको चुनावमा पनि राई हेमन्त र डिकेन्द्रबीच प्रतिस्पर्धा भएको थियो ।
उपाध्यक्षमा भने गठबन्धनका उम्मेदवार विनोद नेम्वाङले एमालेकी सुनिता सुब्बालाई पराजित गर्नुभएको छ । जनता समाजवादीबाट उपाध्यक्ष उम्मेदवार भएका नेम्वाङले ३ हजार ७२९ मत प्राप्त गर्दा निवर्तमान उपाध्यक्ष समेत रहेकी सुब्बाले ३हजार ४६ मत प्राप्त गर्नुभएको छ ।
उपाध्यक्षमा नेम्वाङ र सुब्बाको पनि यो दोस्रो प्रतिस्पर्धा हो । अघिल्लो निर्वाचनमा सुब्बाले नेम्वाङलाई पराजित गर्दै उपाध्यक्ष निर्वाचित हुनुभएको थियो ।
एउटा वडामा बाहेक माङसेबुङ गाउँपालिकामा नेपाली काँग्रेस, माओवादी केन्द्र, जनता समाजवादी पार्टी, राष्ट्रिय जनमुक्ति पार्टीका बीचमा गठबन्धन भएको थियो । वडा नम्बर १ मा भने एमाले र माओवादी केन्द्रबीच गठबन्धन भएको थियो ।
प्रकाशित मिति : २ जेष्ठ २०७९, सोमबार ९ : ११ बजे
प्रतिक्रिया