सुर्खेत । कर्णाली प्रदेशका १० जिल्लामा भागबण्डाका लागि सत्तारुढ दलको बैठक पटकपटक बसे पनि अझै सहमति हुन सकेको छैन । सबै जसाे दलले एक्ला एक्लै निर्वाचनमा जाने आसयको पत्र आएपछि प्रदेश स्तरको सत्तागठबन्धन टोलीले सहमति गर्न नसकेको हो । दिनमा एक पटक पार्टीको बैठक र गठबन्धनको बैठक गरे पनि निकास भने अझै निस्किएको छैन ।
आज पनि बैठक हुने नेकपा माओवादी केन्द्रका कर्णाली प्रदेश इन्चार्ज कालीबहादुर मल्लले बताए । कसैले पनि आ-आफ्ना हट नत्याग्ने हो भने अन्तिममा मित्रवत प्रतिस्पर्धा नै हुने सम्भावना भएकाे उनले बताए । सहमतिको नाममा सहमति गर्न नसकिने निश्कर्षमा माओवादी पुगेको स्रोतले बताएको छ ।
नेपाली कांग्रेसले पनि भागबण्डाभन्दा मित्रवत रुपमै चुनाव लड्न चाहेको एक नेताले बताए । 'समाजवादी कम्जोर अवस्थामा छ, उसैले बढी भाग माग्छ, कसरी हुन्छ सहमति ?' उनले भने । १५ पटकभन्दा बढी बैठक भए पनि सहमति हुन नसकेको उनी बताउँछन् ।
समाजवादीका नेताहरू भने हैसियतभन्दा पनि सहमति महत्वपूर्ण भएकाे बताउँछन् । गठबन्धनमा काे बलियाे काे कम्जाेर भनेर नगरेकाे उनीहरू बताउँछन् ।
चुनावमा टिकट पाउन शक्ति केन्द्र धाउनेको संख्या पनि बढेकाे छ । रुकुम पश्चिमको टिकटका लागि गुनासोको पोको बोकेर गएको कांग्रेस टोली केन्द्रीय नेताले वास्ता नगर्दा निरास भएर फर्केकाे बताइन्छ । समाजवादी जाजरकोटका अध्यक्ष कमानबहादुर खड्का पनि काठमाडौँमै छन् ।
कुशे गाउँपालिकाकी उपाध्यक्ष रामछायाँ शाही सुर्खेतमा छिन् । बुधबार मात्रै पनि मुख्यमन्त्री जीवनबहादुर शाहीको कार्यकक्षमा कांग्रेस नेताहरूको बैठक बसेको थियो ।
प्रकाशित मिति : ८ बैशाख २०७९, बिहिबार ४ : ११ बजे
प्रतिक्रिया