कास्की। कास्कीको माछापुच्छ्रे गाउँपालिका–९ मा वडा कार्यालय भवन निर्माण गरिएको छ । जिल्ला समन्वय समिति र गाउँपालिकाको साझेदारीमा रु ९९ लाख ९० हजारको लागतमा उक्त दुई तले भवन निर्माण गरिएको हो ।
भवन निर्माणमा जिल्ला समन्वय समितिको रु ५९ लाख ९४ हजार तथा गाउँपालिकाको रु ३९ लाख ९६ हजार लगानी रहेको वडाध्यक्ष दुर्गाबहादुर क्षेत्रीले जानकारी दिनुभयो । यसअघि गाउँपालिकाका आठवटै वडा कार्यालयमा आफ्नै भवनबाट सेवा सञ्चालन गरिँदै आएको छ ।
कार्यालयको जिल्ला समन्वय समितिका प्रमुख वैनबहादुर अधिकारी र गाउँपालिका अध्यक्ष कर्णबहादुर गुरुङले संयुक्तरुपमा उद्घाटन गर्नुभयो । भवन निर्माणका लागि स्थानीयवासी आइबहादुर तामाङ र श्रीकुमारी तामाङले एक रोपनी जग्गा निःशुल्क उपलव्ध गराउनुभएको हो । गाउँपालिकाको पनि प्रशासकीय भवन निर्माण अन्तिम चरणमा पुगेको छ । गाउँपालिकाको केन्द्र वडा नं ४ लाहाचोकस्थित सानोपाटनमा १० रोपनी क्षेत्रफलमा रु ६ करोड ६२ लाखको लागतमा भवन निर्माण भइरहेको प्रमुख प्रशासकीय अधिकृत विष्णुप्रसाद पोखरेलले जानकारी दिनुभयो । रासस
प्रकाशित मिति : १६ चैत्र २०७८, बुधबार ११ : २३ बजे
प्रतिक्रिया