आउँदो पुस्ताका लागि…..

कहिले होला 
आखिर कसका लागि 
हाम्रा लागि त पक्कै होइन
निश्चय नै ती कोपिलाका लागि 
जो हुर्किनै छन्
बढ्नै छन्
बुझ्नै छन्
भोग्नै छन् 
हो पक्कै तिनका लागि !

महाकाल
अनित्य वर्तमान
अनि निश्चित भविष्य बुझाइ
ज्ञानरूपि व्यवहार
मुस्काउँदो नियति र धैर्य आचरण बोकी
हुर्काउन समाज 
फेरिनै पर्छ एक युग
हामी त हुर्किसक्यौँ 
दृष्टिकोण बनाइसक्यौँ 
ढुंगुरमा कता ओकल्ने विकार ।

ए बाल्खहरू
अनन्त लैजाऊ समय
इन्द्रिय जो जित्नु छ 
धैर्यको विश्वास गर 
मानवता जो हुर्काउनु छ 
भरमा तिम्रै अडिन्छ समाज
हामी त हाम्रो खाल्डो आफै खन्दैछौँ
त्यही खाल्डोमा जम्ने पानीको हिलोमा फक्रिनु तिमी
हामी माटो बनेर साथ दिनेछौँ
तिमी जीवन बनेर सुवास छर्नू ।

(रचनाकार प्रगतिशील लेखक संघ, लुम्बिनी प्रदेशका सहसचिव हुनुहुन्छ ।)
 

प्रकाशित मिति : १२ चैत्र २०७८, शनिबार  १० : ४२ बजे