काठमाडौँ । कोरोना भाइरसको तेस्रो लहरको प्रवाह कम भएर जनजीवन सामान्य भएसँगै फिल्मी गतिविधि पनि बढ्न थालेका छन् ।
गत साता मात्र ‘म यस्तो गीत गाउँछु–२’ को प्रिमियर गरियो । रिलिज अगाडी गरिएको प्रिमियरले फिल्मी माहौल बनायो । कोरोना भाइरसको महामारी पश्चात् त्यहाँ सेलिब्रेटी देखिए ।
आजबाट प्रदर्शनमा आएको फिल्म ’लप्पन छप्पन–२’ ले पनि सिरिजको पूर्व सन्ध्यामा प्रिमियम गरेको थियो । काठमाडौँमा भएको प्रिमियरमा फिल्म हेर्नेले सकारात्मक प्रतिक्रिया दिएका छन् ।
फिल्मकै कलाकार समेत रहनुभएका शिव श्रेष्ठले फिल्म स्तरीय बनेको प्रतिक्रिया दिनुभयो । फिल्म हेरिसकेपछि सञ्चारकर्मीसँग कुराकानी गर्दै उहाँले नेपाली फिल्म नै बक्स अफिसलाई चलायमान बनाउने विश्वास व्यक्त गर्नुभयो । “फिल्मले राजनीतिको फरक पाटोलाई देखाएको छ । पावर र पैसाको शक्तिले के सम्म गर्न सकिन्छ भन्ने यसमा देखिन्छ”, अभिनेता श्रेष्ठले भन्नुभयो ।
फिल्म हेरेर निस्किएका अर्पण थापाले पनि दर्शकले भरपुर मनोरञ्जन पाउने विश्वास व्यक्त गर्नुभयो । “दर्शकले लामो समयदेखि ग्याङस्टर र राजनीतिक कथा वस्तुका फिल्म हेर्न पाउनुभएको थिएन”, उहाँले भन्नुभयो, “विदेशमा रहेका नेपालीले समेत यसलाई रुचाउनु हुनेछ ।”
मल्टी स्टारर फिल्ममा शिव र अर्पणसँगै सौगात मल्ल, अनुप विक्रम शाही, प्रकाश कुँवर, दीपक क्षेत्री, सरिता गिरी, एञ्जल श्रेष्ठ, अनिल खनाल, राजेन्द्र विष्ट, शक्ति श्रेष्ठ, केरोलिन कोलिन्डा, सुपर गुरुङ, आना ढकाल, सृजना सिना, रञ्जित वन्तलगायतले अभिनय गर्नुभएको छ ।
मुस्ताङमा छायाङ्कन भइरहेको फिल्म ‘लाखे’ मा व्यस्त भएका कारण सौगात मल्ल र अनुपविक्रम शाही प्रिमियरमा उपस्थित हुनुभएन ।
खिलेन्द्रराज तिमसिनाको प्रस्तुति ‘लप्पन छप्पन–२’ लाई मुकुन्द भट्टले निर्देशन गर्नुभएको हो ।
नेपाल, बेल्जियम, अष्ट्रेलिया र नेदरल्यान्डमा छायाङ्कन गरिएको मल्टिस्टारर फिल्म ’लप्पन छप्पन–२’ मा पटकथा र संवादमा निर्देशक भट्ट र सुनिल नेउरेले काम गर्नुभएको छ भने, पटकथामा अमित शर्माको पनि साथ रहेको छ । पुरुषोत्तम प्रधानले खिचेको फिल्ममा हिमाल केसीसहित निर्देशक भट्ट र सिमोन तामाङको एक्सन, निरज केसीले साउण्ड र मिलन श्रेष्ठले सम्पादनमा काम गर्नुभएको छ । गोल्डेन हिल्स पिक्चर्ससँग रोयल कुँवर इन्टरटेनमेन्ट, इपी एजुकेशन अस्ट्रेलिया, उमी ग्रुप युरोप र म्याक मिडियाले सहकार्य गरेका छन् ।
सुरज अधिकारी र प्रजापति सिवाकोटीको कार्यकारी निर्माण रहेको फिल्ममा चिजकुमार श्रेष्ठ, प्रकाश कुँवर, निर्मल कुमार मिश्र र सन्तोषचन्द्र भक्रेल निर्माताको रूपमा हुनुहुन्छ । यसमा समीर खरेल क्रियटिभ निर्माता रहनुभएको छ भने, सह निर्मातामा राजीव तामाङ, वेद बहादुर तामाङ, रानु तिमिला, ताराचन्द शर्मा र सुरज केसी हुनुहुन्छ ।
प्रकाशित मिति : २० फाल्गुन २०७८, शुक्रबार १० : ३८ बजे
प्रतिक्रिया