काठमाडौँ । प्रतिनिधिसभाको आजको बैठकमा एमसीसीका विषयमा छलफलको सम्भावित कार्यसूची सार्वजनिक भएको छ ।
सरकारले गत आइतबार एमसीसी टेबल गरेको र छलफलका लागि आजका लागि प्रतिनिधिसभाको बैठक तय भएको छ ।
आजको संसद् बैठकका दुई सम्भावित कार्यसूची मध्ये एक कानुन, न्याय तथा संसदीय मामिला मन्त्री दिलेन्द्र बढुले महान्यायाधिवक्ताको वार्षिक प्रतिवेदन पेस गर्ने र दोस्रोमा एमसीसी सम्झौता बारे छलफल गर्ने रहेको छ ।
जसलाई संसद् बैठकमा अर्थमन्त्री जनार्दन शर्माले पेस गर्ने सम्भावित कार्यसूचीमा जनाइएको छ । संसद् सचिवालयले जारी गरेको सम्भावित कार्यसूची अनुसार आजको बैठकमा अर्थमन्त्री जनार्दन शर्माले नेपाल सरकार र अमेरिकी सहयोग निकाय मिलेनियम च्यालेन्ज कर्पोरेशन (एमसीसी) बीच भएको अनुदान सहायता सम्झौतामाथि सामान्य छलफल गरियोस् भनी प्रस्ताव प्रस्तुत गर्नुहुनेछ ।
यसअघि आइतबार पनि उहाँले संसद्मा एमसीसी टेबल गर्नु पर्ने थियो । तर उहाँको दल माओवादी केन्द्रका अधिकांश नेता एमसीसीको विपक्षमा छन् । तर अर्थमन्त्री भएका कारण एमसीसी टेबल गर्नुपर्ने भएपछि उहाँ बैठकमा नै उपस्थित हुनु भएन । उहाँ उपस्थित नभएपछि सञ्चार तथा सूचना प्रविधि मन्त्री ज्ञानेन्द्रबहादुर कार्कीले संसद्मा एमसीसी टेबल गर्नुभएको थियो ।
आज एमसीसीका बारेमा उठेका प्रश्नहरूको बारेमा जवाफ दिनु पर्ने भएपछि त्यसलाई छल्नका लागि अर्थमन्त्री सामान्य कार्यक्रममा सहभागी हुन उपत्यका बाहिर जानुभएको छ । जसका कारण सर्वाधिक चासो रहेको एमसीसीबारे संसद्मा बहस हुँदा सम्झौताको एक पक्ष अर्थ मन्त्रालय र त्यसका विभागीय मन्त्री बैठकमा सहभागी नहुने देखिएको छ ।
उहाँ एमसीसी सम्बन्धी प्रस्ताव पेस गर्नु पर्ने भएपछि त्यसलाई छल्नका लागि उपत्यका बाहिर जानुभएको छ । अर्थमन्त्री शर्मा पर्वत उद्योग वाणिज्य सङ्घको आज हुने साधारण सभामा सहभागी हुन कुश्मा पुग्नुभएको छ ।
उहाँको दलले एमसीसी पास गर्न नसकिने निर्णय गरेको छ भने एकीकृत समाजवादीले पनि त्यस्तै निर्णय गरेको छ । तर प्रधानमन्त्री भने गठबन्धन तोडेर भए पनि एमसीसी पास गर्ने पक्षमा रहेको बालुवाटार निकट स्रोतको भनाइ छ ।
प्रकाशित मिति : १२ फाल्गुन २०७८, बिहिबार ९ : ०६ बजे
प्रतिक्रिया