काठमाडौँ । नेपाल–भारत ऊर्जा सचिव स्तरीय ‘संयुक्त निर्देशक समिति’ (जेएससी) को नवौँ बैठक आज काठमाडौँमा बस्दै छ ।
निर्देशक समिति बैठकको नेतृत्व नेपालका तर्फबाट ऊर्जा सचिव देवेन्द्र कार्कीले तथा भारतीय पक्षको नेतृत्व त्यहाँको ऊर्जा मन्त्रालयका सचिव आलोककुमारले गर्नुहुनेछ ।
समितिको बैठक हरेक ६ महिनामा आयोजना गरिने भए पनि कोरोना महामारीका कारण दुई वर्षदेखि हुन सकेको थिएन । २०७६ असोजको अन्तिम सातामा भारतको बैंग्लोरमा बसेपछि यो बैठक बसेको थिएन ।
बैठकको पहिलो दिन आज नेपाल–भारत ऊर्जा सहसचिव स्तरीय संयुक्त कार्य समूह (जेडब्लुजी)को बैठक बस्नेछ, यो । बैठकले टुङ्गो लगाएका विषय दोस्रो दिन हुने सचिव स्तरीय बैठकमा पेस हुनेछन् ।
नेपालका तर्फबाट विद्युत् व्यापार र केही प्रसारण लाइन आयोजनाका बारेमा प्रस्ताव राखिनेछ भने नेपाल विद्युत् प्राधिकरणले आगामी मनसुनदेखि झन्डै ८५० मेगावाट विद्युत् भारत निर्यात गर्ने प्रस्ताव गरेको छ ।
नेपाल र भारतबीच निर्माण हुन लागेको दोस्रो अन्तर्देशीय प्रसारण लाइन न्यू बुटवल गोरखपुरको थप प्रगतिका बारेमा छलफल हुने जनाइएको छ ।
प्रकाशित मिति : ११ फाल्गुन २०७८, बुधबार ७ : ५१ बजे
प्रतिक्रिया