जुम्ला । जुम्लामा उत्पादन गरिएका स्याउका बिरुवा बाहिरी जिल्लामा निर्यात हुन थालेका छन् ।
चन्दननाथ नगरपालिका–८ का हरिबहादुर रोकायाले २४ हजार वटा बिरुवा बेच्नुभएको छ । उहाँले ११ हजार बिरुवा हुम्लाको लागि र १३ हजार बिरुवा बाजुराको लागि बेच्नुभएको हो ।
सृजनशील फलफूल नर्सरी चलाउँदै आउनुभएका उहाँले भन्नुभयो “हुम्लाको सिमिकोटको लागि माग आएको थियो । त्यही मागको आधारमा यस पटक ११ हजार बिरुवा पठाएँ । मेरो नर्सरीमा ४० देखि ५० हजारसम्मको बिरुवा छ ।”
उहाँको स्याउ नर्सरीबाट वार्षिक चार लाखसम्मको आम्दानी हुने गरेको छ । रोकायाको स्याउका बिरुवा गुणस्तरीय रहेको भन्दै विभिन्न ठाउँबाट माग आएको उहाँ दाबी गर्नुहुन्छ । जुम्लाबाट हवाई जहाजमार्फत स्याउका बिरुवा हुम्लामा पुर्याउने गरिएको छ ।
जुम्लाबाट नेपालगञ्ज र नेपालगन्जबाट सिमकोट हवाई मार्गबाट बिरुवा हुम्ला जाने गरेको रोकायाले बताउनुभयो। उहाँले भन्नुभयो, “स्याउका प्रतिबिरुवा ७७ रुपैयाँसम्म पर्ने गरेको छ ।” रेड, रोयल डेलिसियस, गोल्डेन र जनार्थन जातका स्याउका बिरुवा बेच्ने गरेको उहाँले बताउनुभयो ।
४९ हजार बिरुवा निर्यात
जुम्लाको स्याउका बिरुवा बझाङ, बाजुरा, दैलेख, अछाम ,अर्घाखाँची, हुम्ला, कालिकोट र जाजरकोटसम्म निर्यात हुने गरेको कृषि विकास कार्यालय जुम्लाले जनाएको छ ।
जुम्लाबाट बाहिर जिल्ला निर्यात गर्दा कुनै समस्या नहोस् भन्नका लागि कृषि विकास कार्यालयले सिफारिस दिने गरेको बागवानी शाखाका प्रमुख सुष्मा बुढाले बताउनुभयो। उहाँका अनुसार यस वर्ष मात्र ४९ हजार स्याउ र ओखरका बिरुवा जुम्लाबाट निर्यात भएका छन् ।
प्रकाशित मिति : ९ फाल्गुन २०७८, सोमबार १२ : २९ बजे
प्रतिक्रिया