मकवानपुर । बागमती प्रदेशसभाअन्तर्गत अर्थ तथा विकास समिति र शिक्षा, स्वास्थ्य तथा कृषि समितिको सभापति पदमा क्रमशः नारायणबहादुर सिलवाल र केशवप्रसाद पोखरेलले मनोनयन दर्ता गराउनुभएको प्रदेशसभा सचिवालयले जनाएको छ ।
उहाँहरू दुवै जना एमालेका तर्फबाट उम्मेदवार हुनुभएको हो भने दुवै जना काठमाडौँबाटै निर्वाचित हुनुहुन्छ ।
सचिवालयका अनुसार दुवै समितिको आज हुने निर्वाचनमा सत्ता गठबन्धनबाट भने उम्मेदवारी दर्ता भएको छैन ।
आइतबार अपराह्न ५ः०० बजेसम्म उम्मेदवारी दर्ताको समय तोकिएको थियो ।
वैशाखदेखि रिक्त रहेको अर्थ तथा विकास समितिमा २२ जना सदस्यमध्ये एक जना सभापति चयन गरिनेछ भने शिक्षा, स्वास्थ्य तथा कृषि समितिका १९ जना सदस्यमध्ये एक जना सभापति चयन गरिने जनाइएको छ ।
अर्थ तथा विकास समितिमा २० र शिक्षा, स्वास्थ्य तथा कृषि समितिमा १९ जना मतदाता हुनुहुन्छ । यी दुवै समितिमा एमालेका १२–१२ जना सदस्य रहनुभएको छ ।
अर्थ तथा विकास समितिका सदस्यहरू सन्तबहादुर प्रजा र दीपेन्द्र श्रेष्ठ प्रदेश सरकारको मन्त्री रहेका कारण उहाँहरू निर्वाचनमा सहभागी हुनहुने छैनन् ।
अर्थ तथा विकास समितिका तत्कालीन सभापति सरेश नेपाल प्रदेश सरकारको मन्त्री भएसँगै उक्त पद रिक्त थियो । शिक्षा, स्वास्थ्य तथा कृषि समितिका सभापति घनश्याम दाहाल राजेन्द्रप्रसाद पाण्डे नेतृत्वको सरकारमा मन्त्री नियुक्त भएसँगै उक्त पद पनि रिक्त छ ।
प्रदेशसभा सचिवालयले अर्थ तथा विकास समितिको सभापति पदको निर्वाचन आज मध्याह्न १२ः०० बजेका लागि तय गरेको छ भने शिक्षा, स्वास्थ्य तथा कृषि समितिको सभापति पदको निर्वाचन आज दिनको २ः०० बजेका लागि तय गरिएको प्रदेशसभाका सह प्रवक्ता उमेशराज सोतीले जानकारी दिनुभयो ।
प्रकाशित मिति : १७ माघ २०७८, सोमबार ७ : ३१ बजे
प्रतिक्रिया