दाङ । दाङमा माघी मेला स्थगित हुने भएको छ । हरेक वर्ष माघीको अवसरमा आयोजना हुँदै आएको माघी मेला यस वर्ष कोरोना महामारीका कारण स्थगित गरिएको छ ।
दाङको घोराही १३ को बाह्रकुने दह र लमही ९ स्थित बगारबाबा धार्मिक स्थल रिहारमा यस पटक मेला नलाग्ने भएको हो ।
बाह्रकुने दह संरक्षण समितिका अध्यक्ष टेमन बुढाले कोरोना महामारीको जोखिमलाई मध्यनजर गर्दै सरकारले गरेको निर्णय अनुसार दहमा मेला स्थगित गरिएको जानकारी दिनुभयो।
सङ्क्रमण दर बढेको र सरकारले समेत २५ जनाभन्दा बढी भिडभाड हुन तथा मेला महोत्सव गर्न रोक लगाएको हुँदा मेला स्थगित गरिएको उहाँले जानकारी दिनुभयो । धार्मिक स्थल समेत भएकाले मन्दिरमा पूजाआजा भए पनि मेला भने नहुने उहाँले जानकारी दिनुभयो ।
मन्दिरमा पूजा गर्नका लागि प्युठान, रोल्पा, रुकुमबाट दैनिक झन्डै तीन सय मानिसहरू आउने गरेका छन् ।मन्दिरमा भेडाको बली दिइने र परेवा उडाइने गरिन्छ ।
यस्तै लमहीको रिहारमा रहेको तप्तकुण्डमा स्नान गर्न, खिचडी खान र मन्दिरमा पूजाआजा गर्न दाङ लगायत भारतबाट पनि भक्तजन आउने गर्दछन् । त्यहाँ पनि दैनिक मानिसहरूको भिडभाड र जमघट हुने गर्दछ । तर यस वर्ष मेला स्थगित गरिएको बताइएको छ ।
प्रकाशित मिति : २८ पुस २०७८, बुधबार ७ : १७ बजे
प्रतिक्रिया