रविको तेस्रो दिनको बयान सुरु, आजै सकिने

भैरहवा । रवि लामिछानेको विरुद्धमा परेको सहकारी ठगी सम्बन्धी कसुरमा रुपन्देहीको भैरहवामा मंगलबारबाट सुरु भएको बयानलाई आज पनि निरन्तरता दिइएको छ । 

सहकारी ठगी, सङ्गठित अपराध तथा सम्पत्ति शुद्धीकरणको मुद्दामा पक्राउ परेका राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछानेलाई आज तेस्रो दिन बाक्लो सुरक्षाका बीच सरकारी वकिलको कार्यालय रुपन्देहीमा साढे १० बजे बयानका लागि हाजिर गराइएको छ । 

जिल्ला प्रहरी कार्यालयमा रहेका लामिछानेलाई मंगलबार पहिलो दिन प्रारम्भिक बयान ३ घण्टा ३५ मिनेट वयान लिएको थियो त्यस्तै दोस्रो दिन बिहान सवा १० बजे देखि सवा ७ बजे सम्म ९ घण्टा बयान भएपनि सवाल जवाफ नसकिएकोले बिहीबार बयानको अन्तिम टुङ्गो लगाउने गरी साढे १० बजेबाट बयान सुरु भएको छ ।

प्रमुख न्यायधिवक्ता प्रेमराज पौडेलले मुलकुी फौजदारी कार्याव्यवस्थाको दफा १६ मा अनुसन्धान अधिकारीले सरकारी वकिल समक्ष बयान लिने व्यवस्था अनुरूप बयान लिनका लागि यहाँ अनुसन्धान अधिकारीले उपस्थित गराएका छन् । हिजो स्मम भएको बयानको अन्तिम रूप दिँदै रुजु गर्ने र रोलक्रम गर्ने काम आज हुन्छ । उहाँ विरुद्ध परेको सहकारी ठगी विरुद्धको कसुरमा रहेर नै सवाल जवाफ भएका छन् उहाँको सहमतिमा नै सहज रूपमा जवाफ आएको छ ।

कति वटा प्रश्न गरिएको भन्ने बारे यकिन भएको छैन, सम्भवः आज बयान सकिने अनुमान छ । 

मुलुकी फौजदारी कार्यविधि संहिताको दफा ३१ ले प्रहरीले अनुसन्धान गरेपछि प्रतिवेदन सरकारी वकिलको कार्यालयमा पठाउँछ त्यो अनुसन्धान पुरा भएको नदेखिएको अवस्थामा थप अनुसन्धान गर्नु परेमा वा मुद्दाको बीचमा थप बयान लिनुपर्ने देखिएकोमा थप बयान लिन सक्ने व्यवस्था पनि छ । त्यो कानुन टेकेर अवस्था हेरेर बयान फेरि पनि लिन सकिने व्यवस्था छ ।

सरकारी वकिलको कार्यालयमा ठूलो संख्यामा प्रहरी अधिकृतहरू नै खटिएर प्रहरीको घेरामा नै बयान कक्ष सम्म पु-याइएको छ । मंगलबार बयानपछि बाहिर निस्कने क्रममा सरकारी वकिलको कार्यालय परिसरमै ‘खोरमा बाघलाई थुन्दैमा स्याल हुँदैन’ भन्ने प्रतिक्रिया दिएपछि प्रशासनलाई चुनौती थपिएको छ । केही बोलिहाल्छन् की भन्ने डरले लामिछानेलाई छेकेर सरकारी वकिलको कार्यालय र हिरासत सम्मको यात्रा भइरहेको छ । दर्जनौँ नेपाल प्रहरी र सशस्त्र प्रहरीको घेरामा मात्रै उनकाे यात्रा भइरहेको छ । आज बयान सकिए साँझ सम्म उनलाई रुपन्देहीबाट पोखरा पठाइने छ ।

रास्वपाका कार्यकर्ताहरूले लामिछाने रुपन्देही आए देखि नै उनको समर्थनमा विरोध प्रदर्शन गरेका छन् । सोही क्रममा बुधबार दिउसो अदालत अगाडि कार्यकर्ता प्रवेश गर्न खोज्दा सुरक्षाकर्मी बिच केहीबेर तनाव सृजना भएको थियो । आज बिहीबार पनि रास्वपाले रुपन्देहीमा मोटरसाइकल र्‍याली गर्ने तयारी गरेको छ ।  

प्रकाशित मिति : २९ कार्तिक २०८१, बिहिबार  १२ : २९ बजे