काठमाडौ । संविधान दिवस तथा राष्ट्रिय दिवस, २०८१ लाई जनस्तरमा स्मरणीय तथा हर्षोल्लासका साथ मनाउन प्रधानमन्त्री केपी शर्मा ओलीको अध्यक्षतामा मूल समारोह समिति गठन गरिएको छ ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा गृह मन्त्रालयद्वारा आयोजित बैठकले संविधानसभाबाट नेपालको संविधान जारी भएको दिन (२०७२ असोज ३) लाई राष्ट्रियरूपमा मनाउन आउँदो असोज २, ३ र ४ गते तीन दिनसम्म नेपालभित्र र विदेशस्थित नेपाली राजदूतावास तथा नियोगहरू र जनस्तरमा समेत दीपावलीलगायतका विविध कार्यक्रम तय गरेको छ ।
असोज २ गते काठमाडौंको दरबारमार्गमा सांगीतिक महोत्सव (नेसनल डे कन्सर्ट) र असोज ३ गते सैनिक मञ्च टुँडिखेलमा मूल समारोह समितिको कार्यक्रम गर्ने तय भएको छ । यस्तै असोज ४ गते सम्पूर्ण सरकारी निकाय, प्रतिष्ठान, संघ–संस्थाका कार्यालयको छत, वरण्डा र परिसरमा निर्धारित साइजका राष्ट्रिय झण्डा मर्यादापूर्वक राखी सजाउने, सार्वजनिक सवारी साधनहरूमा राष्ट्रिय झण्डा फहराउन आह्वान गर्ने लगायतका कार्यक्रम तय गरिएको छ ।
बैठकमा प्रधानमन्त्री ओलीले जनताको बलिदान र संघर्षबाट संविधान प्राप्त भएकाले संविधान दिवसलाई राज्यस्तरबाट मनाइनुका साथै सबै जाति, समुुदाय र भूगोलका जनताले स्वतःस्फूर्त भव्यरूपमा मनाउनुपर्ने बताउनुभयो ।
उहाँले सामाजिक जीवनका सबै क्षेत्र परिचालित हुने गरी संघ, प्रदेश र स्थानीय तहबाट कार्यक्रम हुनुपर्ने बताउनुभयो । प्रधानमन्त्रीले भन्नुभयो– संविधान दिवस देशको सबैभन्दा ठुलो चाड हो । यो कुनै जाति, समुदाय र भूगोल विशेषको होइन, सिंगा् देशको वार्षिक मेला हो । त्यसअनुसार मनाउने तयारी गर्न म सबैलाई आग्रह गर्दछु ।
प्रधानमन्त्रीको अध्यक्षतामा गठित संविधान दिवस मूल समारोह समितिमा उपप्रधानमन्त्रीहरू, मन्त्रीहरू, राज्यमन्त्रीहरू, काठमाडौं महानगरपालिकाका प्रमुख, नेपाल सरकारका मुख्यसचिव, प्रधानसेनापति, ललितपुर महानगरपालिकाका प्रमुख, नेपाल सरकारका सचिव तथा विशिष्ट श्रेणीका राजपत्राकिंत अधिकृतहरू, नेपाल प्रहरी र सशस्त्र प्रहरीका महानिरीक्षक, राष्ट्रिय अनुसन्धान विभागका मुख्य अनुसन्धान अधिकृत, काठमाडौं उपत्यकास्थित नगरपालिकाका प्रमुखहरू सदस्य र गृह मन्त्रालयका सचिव, सदस्य–सचिव रहनुभएको छ ।
संविधान दिवसका लागि मूल समारोह समितिका साथै प्रचार–प्रसार, बृहद् जनसहभागितासहित राष्ट्रिय गीतहरूको कन्सर्ट कार्यक्रम, सांस्कृतिक झाँकी व्यवस्थापन, सांस्कृतिक विविधता प्रदर्शन व्यवस्थापन, ग्राउण्ड, कवाज तथा व्यायाम व्यवस्थापन, मञ्च सजावट तथा व्यवस्थापनका लागि उपसमिति पनि गठन गरिएको छ ।
प्रकाशित मिति : १० भाद्र २०८१, सोमबार ९ : १९ बजे
प्रतिक्रिया