रोम । इटलीका पूर्वप्रधानमन्त्री सिल्भियो बेर्लुस्कोनी फेरि अस्पताल भर्ना हुनुभएको छ ।
अदालतमा सुनुवाई चलिरहेका बेला उहाँलाई बुधबार फेरि अस्पताल भर्ना गर्नुपरेको उहाँका वकिलहरूले जानकारी दिएका छन् ।
“गत सोमबारदेखि नै उहाँलाई स्वास्थ्यमा समस्या देखिएको थियो, त्यसपछि उहाँलाई अस्पताल भर्ना गरिएको छ,” मिलानमा भएको सुनुवाइका क्रममा उहाँका वकिल फेडेरिको सेक्केनीले भन्नुभयो ।
सन् १९८० को दशकदेखि इटलीमा प्रभावशाली व्यक्तिका रूपमा रहनु भएका बेर्लुस्कोनी इटलीको तीन पटक प्रधानमन्त्री बन्नु भएको थियो ।
उहाँ सञ्चार उद्यमीसँगै अरू धेरै व्यवसायिक संलग्नताका कारण देशमा प्रभावशाली बन्दै राजनीतिक नेतृत्वमा आउनु भएको हो ।
लामो समय देशमा निर्णायक जस्तै बन्दै आउनु भएका बेर्लुस्कोनी पछिल्लो केही समयदेखि अस्वस्थ हुनुभएको छ । उहाँ अहिले ८४ वर्ष पुग्नु भएको छ ।
सन् २०१६ मा उहाँको मुटुको शल्यक्रिया गरिएको थियो । गत सेप्टेम्बरमा पनि उहाँलाई ११ दिन अस्पताल राख्नु परेको थियो । उहाँलाई त्यतिबेला कोरोनाभाइरसको सङ्क्रमणसमेत पुष्टि भएको थियो ।
उहाँको उपचारमा संलग्न चिकित्सक र उहाँका सहयोगीहरूले बेर्लुस्कोनीको अवस्था स्थिर नै रहेको र चिन्ता गर्नु नपर्ने बताएका छन् ।
शक्ति र स्रोतको दुरूपयोग गरेको र आर्थिक अनियमितता गरेको आरोप लागेका पूर्वप्रधानमन्त्री बेर्लुस्कोनीमाथि अहिले अनुसन्धान भइरहेको छ ।रासस÷एएफपी
प्रकाशित मिति : १२ चैत्र २०७७, बिहिबार ७ : ४८ बजे
प्रतिक्रिया