बलेवा । ‘असमानता हटाऔँ, एड्स अन्त्य गरौँ’ नाराका साथ आज ३४औँ विश्व एड्स दिवस मनाइँदै छ ।
हरेक वर्ष डिसेम्बर १ तारिखमा मनाइने विश्व एड्स दिवसलाई प्रभावकारी बनाउन समुदाय तहमा जनचेतना बढाउन आवश्यक भएकामा जोड दिइएको छ ।
दुर्व्यसनमा परेका युवालाई परामर्श दिने तथा क्रमशः एचआइभी एड्सको सङ्क्रमण दर घटाउने योजना आवश्यक भएको जिल्ला स्वास्थ्य कार्यालयका प्रमुख सुरज गुरौले बताउनुभयो ।
दुर्व्यसनमा लागेका युवालाई सुरक्षित सुई वितरण गर्न थालिएको ‘कम्युनिटी सपोर्ट ग्रुप’का प्रमुख प्रदीप जिसीले बताउनुभयो । जिल्लामा १०८ युवाले असुरक्षित रुपमा सुई प्रयोग गरेको पाइएको छ ।
वैदेशिक रोजगारीमा गएका युवा र उनीहरूको परिवार, यौन व्यवसाय गर्ने, लागूपदार्थ दुर्व्यसनमा लागेकाबाट एड्स सङ्क्रमण बढी भएको पाइएको छ । स्वास्थ्य कार्यालय र कम्युनिटी सर्पोट ग्रुप तथा राष्ट्रिय एड्स रोग निवारण तथा समन्वय समितिले अभियान नै थालेका छन् ।
सन् २०३० सम्ममा सङ्क्रमण दर न्यून बनाउने, परीक्षण दर ९५ प्रतिशतसम्म पुर्याउने, उपचार दर पनि ९५ प्रतिशत नै पुर्याउने लक्ष्यका साथ कार्यक्रम अघि बढाइएको गुरौले बताउनुभयो ।
एड्स दिवसका अवसरमा जिल्लामा अन्तर्क्रिया कार्यक्रम आयोजना गरिएको छ । स्वास्थ्य कार्यालयका देवप्रकाश घिमिरे, कम्युनिटी सपोर्ट ग्रुपका जिसी र राष्ट्रिय एचआइभी एड्स समन्वय समितिकी सिर्जना थापाले एड्सको अवस्थाबारे आ–आफ्नो प्रस्तुतीकरण गर्नुभएको थियो । रासस
प्रकाशित मिति : १५ मंसिर २०७८, बुधबार १० : ४३ बजे
प्रतिक्रिया