काठमाडौँ । नेपाल प्रहरीले बैङ्किङ कसुरजन्य अपराधका फरार अभियुक्तलाई पक्राउ गरेको छ ।
प्रहरीको केन्द्रीय अनुसन्धान ब्युरो (सिआइबी) ले बैङ्किङ कसुर मुद्दामा फरार ताप्लेजुङ फुङलिङ नगरपालिका–११ घर भई काठमाडौँको बुढानीलकण्ठ नगरपालिका–३ चपली बस्दै आएका ४६ वर्षीय आन्दीराम इजम लिम्बुलाई शुक्रवार पक्राउ गरेको हो ।
ब्युरोका प्रवक्ता एवं प्रहरी उपरीक्षक श्यामकुमार महतोले उच्च अदालत पाटनको विसं २०७६ मङ्सिर १० को फैसलापछि पाँच दिन कैद सजाय र बिगोबमोजिम रु ३० लाख जरिवाना हुने फैसला गरेपछि फरार लिम्बुलाई शुक्रवार भक्तपुरको नयाँ ठिमीबाट पक्राउ गरिएको जानकारी दिनुभयो ।
पक्राउ परेका लिम्बुले आफ्नो सिद्धार्थ बैङ्क लिमिटेडको खातामा पर्याप्त मौज्दात नहुँदा नहुँदै विभिन्न व्यक्तिलाई झुकाउँदै चेक दिएर बैङ्किङ कसुरजन्य अपराध गरेका थिए ।
उच्च अदालतले उनलाई बैङ्किङ कसुर तथा सजाय ऐन, २०६४ अनुसार उक्त फैसला सुनाएको थियो ।
पक्राउ परेका लिम्बुलाई फैसला कार्यान्वयनका लागि आजै काठमाडौँ जिल्ला अदालतमा पेस गरिएको प्रवक्ता महतोले बताउनुभयो ।
प्रकाशित मिति : ४ मंसिर २०७८, शनिबार ७ : २० बजे
प्रतिक्रिया