काठमाडौँ । प्रधानसेनापति प्रभुराम शर्मा भारत प्रस्थान गर्नुभएको छ ।
भारतीय स्थल सेनाध्यक्षको औपचारिक निमन्त्रणामा मङ्गलवार प्रधानसेनापति शर्मा नौ सदस्यीय भ्रमण टोलीको नेतृत्व गर्दै दिल्ली प्रस्थान गर्नुभएको हो ।
भारतीय स्थल सेनाध्यक्षको मानार्थ दर्ज्यानी ग्रहण गर्न उहाँ दिल्ली भ्रमणमा जानुभएको हो। नेपाल र भारतका सेना प्रमुखलाई कदर स्वरूप एक अर्को मुलुकको मानार्थ महारथीको दर्जाबाट सम्मान गर्ने प्रचलन छ ।
भारतीय राष्ट्रपति रामनाथ गोविन्दले राष्ट्रपति कार्यालयमा बुधवार हुने विशेष समारोहमा प्रधानसेनापति शर्मालाई भारतीय स्थल सेनाको मानार्थ महारथीको दर्ज्यानी चिन्हबाट सम्मान गर्ने कार्यक्रम रहेको नेपाली सेनाका प्रवक्ता सन्तोष बल्लभ पौडेलले जानकारी दिनुभयो ।
उहाँका अनुसार भ्रमण सकेर प्रधानसेनापति शर्मा शुक्रवार स्वदेश फर्कनुहुनेछ ।
२०७७ कात्तिक २० गते राष्ट्रपति विद्यादेवी भण्डारीले भारतीय सेनाध्यक्ष मनोज मुकुन्द नरवाणेलाई नेपाली सेनाको मानार्थ प्रधानसेनापतिको दर्ज्यानी प्रदान गर्नुभएको थियो ।
प्रकाशित मिति : २३ कार्तिक २०७८, मंगलबार १० : ४५ बजे
प्रतिक्रिया