काठमाडौँ ।नेकपा (एमाले) काठमाडौँ महानगरपालिका कमिटी अध्यक्षमा निर्मल देउला चयन हुनुभएको छ ।
एमाले महासचिव ईश्वर पोखरेलले मङ्गलवार उद्घाटन गर्नुभएको काठमाडौँ महानगर अधिवेशनले कमिटी अध्यक्षमा देउलालाई चयन गरेको हो ।
अधिवेशनले उपाध्यक्षमा न्युछेकाजी महर्जन, सचिवमा गणेश श्रेष्ठ, उपसचिवमा सिर्जना भेटुवाल र उपसचिवमा देवेन्द्र खड्गीलाई चयन गरेको छ ।
काठमाडौँ महानगरको कमिटी १०१ सदस्सीय छ ।
त्यस्तैगरी, एमाले ललितपुरका ६ वटै स्थानीय तहमा नयाँ नेतृत्व चयन गरेको छ । १०औँ महाधिवेशन अन्तर्गत मङ्गलवार भएको पालिका अधिवेशनबाट नयाँ नेतृत्व चयन भएको हो ।
एमाले ललितपुर महानगरपालिका कमिटीमा आस्था शाक्य ‘मञ्जली’ अध्यक्ष चयन हुनुभएको छ ।
गोदावरीमा प्रभाकर थापा र महालक्ष्मीमा हरिगोविन्द श्रेष्ठ नगर अध्यक्ष हुनुभएको छ । बागमतीमा नवराज सञ्जेल, महांकालमा पुरुषोत्तम हुमागाईँ र कोञ्जोसोममा कविन्द्र लामा गाउँपालिका अध्यक्ष बन्नुभएको छ ।
प्रकाशित मिति : १० कार्तिक २०७८, बुधबार ११ : ४२ बजे
प्रतिक्रिया