कोरोना खोप लगाउनेलाई १०० डलर दिने अमेरिकी राष्ट्रपति बाइडनको घोषणा

काठमाडौँ । अमेरिकी राष्ट्रपति जो बाइडनले सङ्क्रमण बढिरहेका बेला खोप लगाउने दरमा देखिएको कमीलाई सम्बोधन गर्नका निम्ति खोप लगाउने नयाँ व्यक्तिलाई प्रति व्यक्ति १०० डलर रकम दिन राज्यहरूलाई आह्वान गर्नुभएको छ ।

उहाँले सङ्घीय सरकारका कर्मचारीका लागि पनि नयाँ कडा खोपसम्बन्धी निर्देशन जारी गर्नुभएको बिबिसीले जनाएको छ । अमेरिकामा सङ्घीय सरकार सबैभन्दा ठूलो रोजगारदाता हो । सङ्घीय सरकारका निकायहरूमा करिब २० लाख मानिसहरू काम गर्ने गर्दछन् ।

राष्ट्रपति बाइडनले जारी गर्नुभएको निर्देशन अनुसार अब कर्मचारीहरूले खोप लगाएको प्रमाण देखाउनुपर्नेछ वा अनिवार्य परीक्षणको सामना र मास्क लगाउन तयार हुनुपर्नेछ।

आधिकारिक विवरण अनुसार हालसम्म अमेरिकामा आधा जनसङ्ख्याले मात्र खोपको पूरा मात्रा लिएका छन् । बिहीवार ह्वाइट हाउसमा बोल्नुहुँदै राष्ट्रपति बाइडनले बढी सङ्क्रामक डेल्टा भेरियन्टका कारण नयाँ प्रतिबन्धहरू लगाउनु परेको बताउनुभयो । उक्त भेरियन्टले खोप नलगाएकाहरूमा महामारी निम्त्याएको छ।

खोप नलगाउँदा हुनसक्ने जोखिमबारे उहाँले भन्नुभयो, “मानिसहरूको मृत्यु भइरहेको छ र जसको निधन नहुनु पर्ने हो उनीहरूको पनि हुनसक्नेछ।”

राष्ट्रपति बाइडनले पहिले नै खोप लगाइसकेका अमेरिकीहरूका लागि न्यायसङ्गत जस्तो नदेखिए पनि सबैका हितका लागि नगद प्रोत्साहन दिने घोषणा गरिएको बताउनुभयो । उहाँले भन्नुभयो, “यदि हामी माझ धेरै भन्दा धेरै खोप लगाएका व्यक्तिहरू भए भने हामी सबैलाई राहत हुनेछ।”

अमेरिकी राज्यहरूलाई खोप लगाउने नयाँ व्यक्तिहरूलाई अब प्रतिव्यक्ति एक सय डलर दिन उहाँले आह्वान गर्नुभएको छ । उक्त रकम राज्यहरूले अमेरिका रेस्क्यु प्लान अन्तर्गत रहेको १.९ ट्रिलियनको कोषबाट प्रयोग गर्न सक्नेछन्।

राष्ट्रपति बाइडनले खोप लगाउन कामदारलाई समय दिने साना र मझौला व्यवसायमा त्यसबाट पुगेको आर्थिक क्षतिको सङ्घीय सरकारले परिपूर्ति गरिदिने बताउनुभयो।

यद्यपि खोप लिन अस्वीकार गर्ने सरकारी कर्मचारीलाई जागिरबाट निकालिने छैन । ह्वाइट हाउसले देशभरिका अन्य रोजगारदाताका लागि पनि त्यस्तै गर्न प्रोत्साहित गर्नका निम्ति उक्त कदम चालेको हो ।

गत महिनाको एउटा अध्ययनले अमेरिकामा ९९ प्रतिशत कोभिडसम्बन्धी मृत्यु खोप नलगाएका व्यक्तिमा देखाएको छ।

प्रकाशित मिति : १५ श्रावण २०७८, शुक्रबार  ८ : ५२ बजे