काठमाडौं। नुवाकोटको सूर्यचौर गाउँपालिका–७ मा भएको एयर डाइनेस्टीको हेलिकप्टर दुर्घटनामा मृत्यु हुने पाँचै जनाको शव काठमाडौं ल्याइँदै छ ।
हेलिकप्टर दुर्घटनामा परी मृत्यु हुने नेपाली नागरिक क्याप्टेन अरुण मल्लसहित अन्य चार चिनियाँ नागरिकको शव काठमाडौं ल्याइएको हो ।
क्याप्टेन मल्लसहित चिनियाँ नागरिक ताङ जुताओ, उ यियाओ (महिला), लि जिइ र झी जेमिङको शव संकलन गरी पोष्टमार्टमका लागि त्रिवि शिक्षण अस्पताल महाराजगन्ज काठमाडौं ल्याउने तयारी गरिएको नागरिक उड्डयन प्राधिकरणले उल्लेख गरेको छ।
बुधबार दिउँसो करिब २:२० बजे शिवपुरी गाउँपालिका वडा नम्बर ७ स्थित सूर्यचौरमा एयर डाइनेष्टीको हेलिकप्टर दुर्घटनामा परेको थियो।
हेलिकप्टर काठमाडौंबाट १:५४ बजे रसुवाको स्याप्रुबेँसीका लागि उडेको थियो। काठमाडौंबाट उडेको तीन मिनेटमै एयरटावरसँग सम्पर्कविच्छेद भएको थियो । त्यसको केही समयपछि हेलिकप्टर दुर्घटनामा परेको थियाे ।
यसैबीच सरकारले एयर डाइनेस्टी हेलिकप्टर दुर्घटनाबारे छानबिन गर्न आयोग गठन गर्ने निर्णय गरेको छ।
नेपाली सेनाका वरिष्ठ पाइलट सुवास थापाको संयोजकत्वमा गठन भएको आयोगको सदस्यमा विष्णु बस्नेत र तनुजा पोखरेल रहनुभएकाे छ ।
प्रकाशित मिति : २३ श्रावण २०८१, बुधबार ६ : ४४ बजे
प्रतिक्रिया