काठमाडौं । मौद्रिक नीतिको व्यवस्थाहरूको कार्यान्वयन सुरु भएको छ । नेपाल राष्ट्र बैंकले चालु आर्थिक वर्षको वार्षिक मौद्रिक नीतिमार्फत उल्लेख भएका व्यवस्थाहरूलाई कार्यान्वयनका लागि सर्कुलर जारी गरेपछि कार्यान्वयन हुने बाटो खुलेको हो ।
बैंकले सर्कुलरमार्फत असल कर्जामा १.१० प्रतिशत मात्र प्रोभिजन गरे पुग्ने भएको छ । बैंक तथा वित्तीय संस्थाले अब असल कर्जामा १.१० प्रतिशत मात्रै प्रोभिजन गरे पुग्ने भएको हो । त्यसो त यसअघि भने यस्तो कर्जामा १.२० प्रतिशत प्रोभिजन गर्नुपर्ने व्यवस्था रहेको थियो ।
जारी सर्कुलर अनुसार ‘१ वर्षभन्दा बढी ग्रेस अवधि भएका ऊर्जा लगायतका पूर्वाधार निर्माणसँग सम्बन्धित परियोजनाहरूमा प्रवाहित असल कर्जाको ग्रेस अवधिसम्म प्रत्येक वर्ष समानुपातिक रूपमा कर्जा नोक्सानी व्यवस्था गरी अन्तिम वर्ष १.१० प्रतिशत सामान्य कर्जा नोक्सानी व्यवस्था कायम गर्न सकिनेछ ।’
त्यसो त कुनै कर्जाको ग्रेस अवधि चार वर्ष रहेछ भने त्यस्तो कर्जाका लागि पहिलो वर्ष ०.२७५ प्रतिशत, दोस्रो वर्ष ०.५५ प्रतिशत, तेस्रो वर्ष ०.८२५ प्रतिशत र चौथो वर्षदेखि १.१० प्रतिशत साधारण कर्जा नोक्सानी व्यवस्था कायम गर्न सकिने व्यवस्था गरेको छ ।
प्रकाशित मिति : १७ श्रावण २०८१, बिहिबार २ : ५६ बजे
प्रतिक्रिया