नेपालमा केही पनि भएको छैन भन्ने भाष्य निर्माण गर्न खोजिनु गलत : उपमहासचिव ज्ञवाली

काठमाडौं । नेकपा एमालेका उपमहासचिव प्रदीप ज्ञवालीले नेपालमा केही पनि भएको छैन भन्ने भाष्य निर्माण गर्न खोजिएको बताउनुभएको छ । 

शनिबार नेकपा एमाले केन्द्रीय कार्यालयमा नेत्रप्रसाद गौतमद्वारा लिखित नेत्रका तीन खण्डकाव्य र भूत पिसाचका कथा सङ्ग्रह लोकार्पण कार्यक्रममा बोल्दै ज्ञवालीले देशमा केही पनि भएको छैन भन्ने भाष्य निर्माण गर्न एउटा पङ्ती लागेको बताउनुभयो । सोचे जति हुन नसकेको भए पनि देश धेरै अगाडि बढेको उहाँको धारणा छ । ‘एउटा पङ्ती छ नेपालमा जसले केही पनि भएन भन्छ’, उहाँले भन्नुभयो ।  

गौतमले लेखेको पुस्तक एक पटक पढ्ने हो भने हिजो हामी कहाँ थियौँ र आज कहाँ आइपुग्यौँ भन्ने कुरा सहजै बुझ्न सकिने बताउनुभयो । पुस्तकले नेपाल अघि बढेको यात्रा देखाउने उहाँले बताउनुभयो ।

सही ढङ्गले व्यवस्थापन हुन सकेको भए धेरै अगाडि पुग्न सकिने भए पनि केही भएकै छैन भन्ने कुरा भने गलत भएको उहाँको धारणा छ । केही पनि भएन भन्ने कुरालाई भने एउटै पुस्ताले हिजो र आजलाई हेर्दा थाहा हुने ज्ञवालीको भनाइ छ । 
मानिसलाई धेरै कुराले विचलित बनाउने बताउँदै उहाँले निष्ठा जोगाउनु सामान्य कुरा नभएको बताउनुभयो । आशा, त्रास, लोभ, प्रलोभनका बिचमा निष्ठा जोगाउने कुरा चानचुने नभएको ज्ञवालीले धारणा राख्नुभयो ।
 

प्रकाशित मिति : १२ श्रावण २०८१, शनिबार  ७ : ०६ बजे