नेपाली सेनामा अझै गणतन्त्र आएको छैन : पृथ्वीसुब्बा गुरुङ

काठमाडौं । नेकपा (एमाले) का उपमहासचिव पृथ्वीसुब्बा गुरुङले नेपाली सेनाभित्र गणतन्त्र नआएको टिप्पणी गर्नु भएको छ ।

बुधबार प्रतिनिधि सभाको बैठकमा रक्षा मन्त्रालय अन्तर्गतको विनियोजन विधेयकमाथि छलफलमा भाग लिँदै नेपाली सेनाभित्र लोकतान्त्रिकरण गर्नु पर्ने बताउँदै सेनामा गणतन्त्र नआएको जस्तो आफूलाई लागेको टिप्पणी गर्नु भएको हो ।

उहाँले भन्नुभयो, ‘नेपाली सेनाको अझै आधुनिकीकरण, पेशागत हिसाबले सक्षम बनाउनुपर्नेछ। सेनाभित्र लोकतान्त्रिकरण गर्नुपर्नेछ, त्यहाँभित्र गणतन्त्र आएको छैन भन्ने लाग्छ । त्यसको बारे रक्षा मन्त्रालयले पोलिसी पर्नेछ, सेनालाई आधुनिकीकरण गर्नुपर्ने आवश्यकता छ,परम्परागत रुपमा चल्न दिनुहुँदैन ।’

नेपाली सेनाको बजेट परम्परागत भएको बताउदै कर्मचारीले बनाएको बजेटमा राजनीतिक नेतृत्वले हस्तक्षेप गर्न नसकेको धारणा राख्नुभयो ।उहाँले संवेदनशील अंग नेपाली सेनालाई व्यापार, ठेक्कापट्टा गर्न दिनु कतिको जायज छ ? भन्दै प्रश्न गर्नु भएको थियो । गुरुङले सेनाको महत्वकांक्षा बढ्दै जाँदा त्यसले लोकतन्त्रमाथि नै खतरा हुनसक्ने समेत बताउनुभयो ।

राष्ट्रिय सुरक्षा भनेको नेपाली सेना मात्र हो भन्ने बुझाई सबैको रहेको भन्दै यो सत्य नभएको उहाँको भनाइ छ । नेपाली सेना राष्ट्रिय सुरक्षाको महत्वपूर्ण अंग भएपनि अन्य अंग नेपाल प्रहरी, सशस्त्र प्रहरीको पनि भूमिका रहेको धारणा राख्नुभयो ।

प्रकाशित मिति : ३० जेष्ठ २०८१, बुधबार  ३ : ४६ बजे