काठमाडौं । राष्ट्रपति रामचन्द्र पौडेल अन्तर्राष्ट्रिय श्रम सम्मेलनमा भाग लिन स्वीट्जरल्याण्डको जेनेभा जाने हुनुभएको छ।
सिंहदरबारमा बिहीबार बसेको मन्त्रिपरिषद् बैठकले नेपाली प्रतिनिधिमण्डलको प्रतिनिधित्व गर्दै जेठ ३१ गते स्वीट्जरल्याण्डको जेनेभामा आयोजना हुने अन्तराष्ट्रिय श्रम सम्मेलनको ११२औं अधिवेशनमा सहभागी हुने राष्ट्रपति पौडेलको कार्यक्रमलाई स्वीकृत गरेको हो।
बैठकले त्यसलगतै राष्ट्रपति पौडेलबाट हुने जर्मनी भ्रमणसमेत स्वीकृत गरिएको सरकारका प्रवक्ता रेखा शर्माले जानकारी दिनुभयो ।
त्यस्तै नेपाल न्यायसेवा तर्फको राजपत्राङ्कीत विशिष्ठ श्रेणी पदमा खेमराज ज्ञवाली, याम बहादुर बुढा मगर र भद्रकाली पोखरेललाई बढुवा नियुक्त गरी क्रमशश नायब महान्याधीवक्ता, न्याय परिषद्को सचिव र सर्वोच्च अदालतको रजिष्ट्रार पदमा पदस्थापन गर्ने निर्णय गरेको उहाँले जानकारी दिनुभयो ।
मन्त्रिपरिषद् बैठकले वन दोस्रो संशोधन नियमावली २०८१ स्वीकृत गरेको छ भने तिलगंगा आँखा विश्वविद्यालयसम्बन्धी व्यवस्था गर्न बनेको विधेयक संघीय संसदमा पेस गर्न स्वीकृति प्रदान गर्ने निर्णय भएको प्रवक्ता शर्माले जानकारी दिनुभयो ।
प्रकाशित मिति : १७ जेष्ठ २०८१, बिहिबार ७ : ०२ बजे
प्रतिक्रिया