काठमाडौं । काठमाडौंको गौशालामा सिराहा धनुषा होटल एन्ड लजमा शनिबार मृत फेला परेकी प्रमिला दमाईको प्रेमी पक्राउ परेका छन्।
रामेछापको लिखु तामाकोसी घर भएकी प्रमिला शुक्रबार साँझ एक पुरुषसँग उक्त होटलमा आएकी थिइन्। जिल्ला प्रहरी परिसर काठमाडौंका प्रवक्ता कुमोध ढुंगेलका अनुसार गौसालाको विजयचोकमा रहेको उक्त होटलको कोठा दुई दिनसम्म नखुलेपछि होटल कर्मचारीले प्रहरीलाई खबर गरेका थिए।
उनीसँगै होटलमा पुगेका एक युवक आइतबार काठमाडौंबाट पक्राउ परेको ढुंगेलले बताए। उनले भने, हामीले क्रस चेक गरिरहेका छौं। प्रारम्भिक अनुसन्धान गरिरहेका छौ। पक्राउ परेका युवक प्रमिलाका प्रेमी हुन्। उनी दोलखाका स्थानीय हुन्।' मृतक प्रमिला र युवक दुवै विवाहित हुन्। प्रमिलाको एक सन्तान र श्रीमान् गौशालामै सँगै बस्दै आएका थिए।
उनीहरू २६ गते साँझ उक्त लजमा पुगेका थिए। होटलमा युवकले गलत विवरण टिपाएका थिए। मृत भेटिएकी प्रमिलाको घाटिमा डोरीले कसेर हत्या गरिएको प्रहरीले बताएको छ। युवकले प्रमिलालाई मार्ने नियतले नै लजमा पुर्याएको प्रहरीको अनुमान छ।
हत्यापछि होटलको कोठामा बाहिरबाट साँचो लगाएर उनी भागेका हुन्। माघ २६ मा हत्या भएको र दुई दिनपछि घटना सार्वजनिक भएको थियो।
प्रकाशित मिति : २८ माघ २०८०, आइतबार ८ : ५८ बजे
प्रतिक्रिया