कवि चम्रेल काठमाडौँमा बस्छन्
बिहानभरि चर्चमा निधार ठोक्छन्
दिनभरि प्रगतिवाद घोक्छन्
बेलुका भएपछि बोतल घोक्छन्
फाइदा हुने हुने तराजुमा आफूलाई जोख्छन् ,
घरी देशभक्त खनालको नाममा टिपेक्स दल्छन्
घरी भिक्टर प्रधानको नाममा कालो पोत्छन्
पटक पटक प्रज्ञा प्रतिष्ठानको जागिर खान्छन्
भन्न त आफूलाई द्वन्द्ववादी भन्छन्
तर चरम धनवादमा रमाउँछन्
१
जनवादको बखान गरेर कहिल्यै थाक्दैनन्
टिके प्रधानमन्त्रीको स्वागतका लागि हातमा टोपी लिएर दगुर्छन्
आफूलाई मार्क्सवादी भन्छन्,
तर मार्क्सवाद बचाउन चारतारे झण्डा बोक्छन्
कवि चम्रेल यसरी दैनिकी बिताउँछन्
२
कवि चम्रेल सदा काठमाडौँ कुर्छन्
मन्त्री र माननीयका घरघर घुर्छन्
कुनै नियुक्ति पाएनन् भने
रिसको झोँकमा क्रान्तिधारी कविता कोर्छन्
विचारलाई अचार बनाउँछन् र खान्छन्
गुट र फुटमा रमाउँछन्
मार्क्सवाद होइन मासु र भात भन्छन्
जात,भात र थर गोत्रको नेता मात्र मन पराउँछन्
सिद्धान्त भने
सिँगौरामा झुन्ड्याउँछन्
३
कवि चम्रेल तुइन विस्थापितता भएको देख्दैनन्
धरहरा अग्लिएको हेर्दैनन्
सुन्दर, शान्त र मनमोहक रानी पोखरीमा जाँदैनन्
श्रमजीवी जनताका आठ लाख घर बनेको सुन्दैनन्
फगत लेख्नका लागि लेख्छन्, लेखिरहन्छन्
सबै शासकलाई चन्द्र शमशेर देख्छन्,
कवि चम्रेल काठमाडौँमा बस्छन्
प्रकाशित मिति : २६ माघ २०८०, शुक्रबार १ : ५२ बजे
प्रतिक्रिया