तपाई–हामी सामाजिक प्राणी भएका कारण मान्छेका बीच हुनु स्वाभाविकै हो । त्यसमाथि कसैसँग पनि सामिप्यता हुनुले सम्बन्ध पनि बलियो हुन्छ । तर मुख गन्हाउने मान्छेलाई अरुका नजिक जान पनि गाह्रो हुन्छ । किनकि, मुख गन्हाएको अरुले तुरुन्तै थाहा पाउँछन् । मुख गन्हाउनाले हाम्रो सामाजिक व्यक्तित्वका साथै पारिवारिक सम्बन्धमा पनि असर गर्छ । त्यसैले मुख नगन्हओस् भनी प्राचीन कालदेखि नै मान्छेले विभिन्न तरिका अपनाउने गर्दै आएको छ । तपाई–हामी पनि केही घरेलु उपाय अपनाई मुख गन्हाउने समस्याबाट छुटकारा पाउन सक्छौँ ।
मुखबाट आउने दुर्गन्धले तपाईको सम्पर्कमा आउने व्यक्तिहरूबाट तपाईलाई टाढा बनाउनुका साथै तपाईको व्यक्तित्वलाई पनि प्रभावित पार्न सक्दछ । अझ प्रेमी/प्रेमिका वा जीवनसाथीको सम्बन्धलाई यसले झन् खल्लो बनाउन सक्दछ । कैयौं मानिसलाई मुखको दुर्गन्धको समस्या कसरी हटाउने भन्ने कुराले पिरोलिरहेको हुन्छ ।
मुखबाट दुर्गन्ध आउने कारणहरूः
दाँत राम्ररी वा नियमित नमाझेमा ।
- दाँत वा गिजाको रोग ‘पायरिया’ भएमा ।
- पेट राम्ररी सफा नभई कब्जियत हुने गरेमा ।
- दाँतमा अड्किएको खाद्य वस्तु ननिस्किएमा ।
- पाचन प्रणालीमा गडबडी भएमा ।
- पेट सम्बन्धी विभिन्न रोग लागेमा ।
- गिजा सुन्निएमा ।
- दाँतलाई सहारा दिने हड्डीमा सङ्क्रमण भएमा ।
- कमसल खालको नक्कली दाँत लगाउनाले ।
- मुख, जिब्रो, घाँटी वा पेटको क्यान्सरका कारणले ।
- मुख वा घाँटीमा घाउ भएमा ।
- पेटमा जुका, चुर्ना, नाम्ले किरा आदि भएमा ।
- धुम्रपान, मद्यपान तथा गुटखा, आदि सेवन गर्नाले ।
- फोक्सो सम्बन्धी सङ्क्रमण वा रोग भएमा ।
- लामो समय ‘डिहाइडे«ट’ अर्थात् पानी नपिई मुख सुक्खा रहेमा ।
मुखको दुर्गन्ध हटाउन के गर्ने ?
- मञ्जनले दाँत माझ्दा हतार नगरी राम्ररी माझेमा मञ्जनमा भएको ‘एन्टी व्याक्टेरियल’ तत्त्वले जिवाणु वा किटाणुलाई पनि मार्दछ ।
- कब्जियत हुन नदिने ।
- पेट सदा सफा राख्ने कोशिस गर्ने ।
- अपच तथा अजीर्ण हुन नदिने ।
- गरिष्ठ भोजन, मर–मसला, मासु लगायत सेवन नगर्ने ।
- शाकाहारी एवं सात्विक भोजनमा जोड दिने ।
- दाँत र जिब्रोमा जम्ने फोहोरबारे सदा सचेत रहने ।
- अचेल बजारमा विभिन्न प्रकारका ‘माउथ फ्रेसनर’ हरू पाइन्छन् । मुखको दुर्गन्ध हटाउन तीमध्ये आफ्नो अनुकूल कुनै ‘माउथ फ्रेसनर’ प्रयोग गर्ने ।
- प्याज, लसुन जस्ता गन्ध आउने खाद्य पदार्थलाई खाना खानुअघि वा खानाको बीचमा मात्र प्रयोग गरेमा केही हदसम्म प्याज, लसुनको गन्ध कम हुन्छ ।
- यसैगरी जाइफल, सेतो मरुवा, जावित्री, तुलसी र सक्खरलाई समान मात्रामा मिलाई चूर्ण बनाएर सेवन गर्नाले पनि मुखको दुर्गन्ध हट्दछ ।
- बेलाबेलामा, ल्वाङ सुकमेल चपाउने वा चुस्ने गरेमा पनि मुखको दुर्गन्ध हट्दछ ।
- खाना खाएपश्चात् जिरा वा सांैफ चपाउने गरेमा मुखको दुर्गन्ध कम हुन्छ ।
- अनारको बोक्रा पिँधेर पानीमा उमालेर बोक्रा छानी कुल्ला गर्ने गरेमा पनि मुखको दुर्गन्ध हट्दछ ।
- नून र तातो पानीले गारगल गर्ने गरेमा पनि घाँटी सफा भई दुर्गन्ध हट्दछ ।
- नागरबेलको पातमा सुपको दाना एवं गुलकन्द हालेर चपाउनाले मुखको गन्ध हट्छ ।
- धनियाँ र मिश्री मिलाएर चपाउनाले मुखको दुर्गन्ध हट्छ ।
- सुपको दाना चपाएर खानाले पनि मुखको दुर्गन्ध हट्छ ।
- मिश्री या सखरमा इलाइचीका दानाहरु मिलाएर चपाउनाले मुखबाट आउने गन्ध ठीक हुन्छ ।
- फिट्किरीपानीले मुख कुल्ला गर्नाले पनि मुखको दुर्गन्ध हट्छ ।
प्रकाशित मिति : १२ माघ २०८०, शुक्रबार ४ : ११ बजे
प्रतिक्रिया