काठमाडौं । काठमाडौँ उपत्यकामा आज (सोमबार) देखि मेलम्चीको पानी पुनः वितरण थालिएको छ । प्रधानमन्त्री पुष्पकमल दाहाल ‘प्रचण्ड’ ले सिंहदरबारस्थित प्रधानमन्त्री कार्यालय परिसरमा रहेको धारामा पानी पिएर खानेपानी पथान्तरण तथा पुनः वितरणको शुभारम्भ गर्नुभएको हो ।
अनामनगर, मीनभवन, महाँकालचौर, रिगनी, भक्तपुर, खुमलटार, बालाजु र बाँसबारी क्षेत्रमा क्रमिकरूपमा पानी वितरण गरिने खानेपानी मन्त्रालयका सचिव सुरेश आचार्यले जानकारी दिनुभयो । सिन्धुपाल्चोकको अम्बाथानबाट बुधबारदेखि सुरुङमा छाडिएको पानी सुन्दरीजल आइपुगेको तथा खानेपानीको परिमाण मापन गरी क्रमिकरूपमा काठमाडौंका सबै क्षेत्रमा वितरण गरिने उहाँले बताउनुभयो ।
प्रधानमन्त्री ‘प्रचण्ड’ले १२ महिना मेलम्ची खानेपानीको ल्याउन सम्बन्धित निकायलाई निर्देशन दिनुभएको छ । उहाँले निर्देशन दिएर तोकिएको समयअघि नै पानी ल्याउन सफल भएको पनि बताउनुभयो । ‘मलाइ गर्व र हर्षको महसुस भएको छ, यो अथक प्रयासले २८ दिनको समय तोकेर कार्ययोजनासहित निर्देशन दिएको थिएँ, तर अघि नै पानी ल्याएर शुभारम्भ भएकोमा धन्यवाद, अब वितरणको काम दिगो हुने छ, १२ महिना ल्याउन यहाँबाट सम्बन्धित निकायलाई निर्देशन पनि दिन्छु’, उहाँले भन्नुभयो । उहाँले जटिल समस्या आए सरकारले तत्कालै सम्बोधन गर्ने पनि बताउनुभयो । ‘बाढीको कारण १२ महिना पानी ल्याउन सकिएन,अब यसलाई सरकारले पहिलो प्राथमिकता दिएको छ’, उहाँले भन्नुभयो ।
प्रकाशित मिति : १ माघ २०८०, सोमबार ११ : ०६ बजे
प्रतिक्रिया