गभर्नर अधिकारीविरुद्ध सर्वोच्च अदालतमा परेको रिटमाथि आज सुनुवाइ हुँदै

काठमाडौँ । नेपाल राष्ट्र बैङ्कका गभर्नर महाप्रसाद अधिकारीविरुद्ध सर्वोच्च अदालतमा परेको रिटमाथि आज सुनुवाइ हुने भएको छ ।  

कानुन व्यवसायीहरू दीपकराज जोशी, प्रतापसिंह ठकुराठी, दामोदर तिमिल्सना र चुडामणि भण्डारीले गभर्नर अधिकारीको शैक्षिक योग्यता नपुगेको दाबी गर्दै  सर्वोच्च अदालतमा बिहीबार रिट दायर गर्नुभएको थियो। उक्त दायर रिटमा आज सुनुवाइ हुन लागेको हो ।  

गभर्नर अधिकारीले त्रिभुवन विश्वविद्यालयबाट स्नातकोत्तर सरहको समकक्षता लिएको जिकिर गरेको भए पनि ऐनमा स्नातकोत्तर तह उत्तीर्ण भएकै हुनुपर्ने सर्त तोकेकाले समकक्षताको भरमा योग्यता नपुग्ने रिटमा भनिएको छ ।

सरकारले अधिकारीलाई २०७६ साल २४ चैतमा केन्द्रीय बैङ्कको गभर्नरमा नियुक्त गरेको थियो । नेपाल राष्ट्र बैङ्क ऐनको दफा २० मा भएको गभर्नरको योग्यतासम्बन्धी व्यवस्थामा आर्थिक, मौद्रिक, बैङ्किङ, वित्तीय, वाणिज्य, व्यवस्थापन, जनप्रशासन, तथ्याङ्क शास्त्र, गणित वा कानुनमा स्नातकोत्तर भई त्यही क्षेत्रमा अनुभव हासिल गरेको हुनुपर्ने उल्लेख छ ।

प्रकाशित मिति : १३ पुस २०८०, शुक्रबार  ८ : ५२ बजे