काठमाडाैँ । अस्ट्रेलियाले भिसा नियममा कडाइ गर्ने तयारी गरेकाे छ । आगामी दुई वर्षभित्र आप्रवासी प्रवेशमा ५० प्रतिशतले कमी ल्याउने लक्ष्यका साथ अस्ट्रेलियाले भिसा नियममा कडाइ गर्ने तयारी गरेकाे हाे ।
यसबाट अन्तर्राष्ट्रिय विद्यार्थी र कम सीप भएका कामदारको अस्ट्रेलिया जाने दरमा कमी आउने छ। आसन्न नियमअन्तर्गत अन्तर्राष्ट्रिय विद्यार्थीले हालको भन्दा उच्च अंग्रेजी प्रवीणता परीक्षण स्कोर प्राप्त गर्नुपर्ने हुन्छ।
नयाँ नीतिले अस्ट्रेलियाको सीप बजार र अर्थतन्त्रमा सक्रिय रूपमा योगदान नगर्ने अन्तर्राष्ट्रिय विद्यार्थीलाई स्वदेश फर्कन बाध्य पार्नेछ।
यससँगै अस्ट्रेलियामा अध्ययन योजना बनाउने सम्भावित विद्यार्थीले पनि कडा प्रवेश नियमको सामना गर्नुपर्ने हुन्छ ।
नेपाली विद्यार्थीका लागि पहिलो रोजाइमा पर्ने अस्ट्रेलियाको नयाँ भिसा नीतिले चिन्ता बढाएको छ। परिमार्जित अध्यागमन नीतिले सम्भावित विद्यार्थी, अस्ट्रेलियामा रहेका विद्यार्थी र पर्यटक भिसालाई विद्यार्थी भिसामा परिणत गर्न खोज्ने व्यक्ति प्रभावित हुनेछन्।
साथै स्थायी बसोवासका लागि त्यहाँ रहेका कानुनी कमजोरीको फाइदा उठाउनेलगायत विभिन्न समूहलाई पनि नयाँ नीतिले प्रभावित पार्ने विज्ञहरू बताउँछन्।
नयाँ नीतिअनुसार विद्यार्थीले अंग्रेजी भाषा परीक्षामा न्यूनतम ६.५ अंक प्राप्त गर्नुपर्ने छ, जुन पहिला ६ मात्र थियो।
यसबाहेक अस्ट्रेलिया सरकारले सीप बजारमा विद्यार्थीको योगदान, आर्थिक अवस्था र सीप विकास गरी स्वदेश फर्कने अभिप्राय जस्ता मापदण्डका आधारमा भिसा उपलब्ध गराउने योजना बनाएको छ।
अस्थायी निवास भएका स्नातकोत्तर विद्यार्थीले अब भिसा प्राप्त गर्ने छैनन्, जसले स्थायी निवास ‘पिआर’ प्राप्त गर्ने अहिलेको बाटो अवरुद्ध गर्ने छ ।
प्रकाशित मिति : २९ मंसिर २०८०, शुक्रबार २ : ३१ बजे
प्रतिक्रिया