मुस्ताङ । मुस्ताङको एक विद्यालय हाताभित्र पाँच वर्षीया बालिका बलात्कृत भएकी छिन् ।
ती बालिकालाई बलात्कार गरेको अभियोगमा लोमान्थाङ गाउँपालिका–३ बस्ने २६ वर्षीय जप्याङ गुरूङलाई बिहीबार प्रहरीले पक्राउ गरेको छ । ईलाका प्रहरी कार्यालय लोमान्थाङबाट खटिएको प्रहरीले उनलाई पक्राउ गरेको हो ।
गुरूङले ती बालिकालाई थासाङ गाउँपालिका–२ स्थित विद्यालयको कक्षाकोठामा बलात्कार गरेको प्रहरीले जनाएको छ । घटनाका सम्बन्धमा प्रहरीले आवश्यक अनुसन्धान गरिरहेको बताएको छ ।
यस्तै, बर्दियामा १७ वर्षीया किशोरी बलात्कृत भएकी छिन् । उनलाई बलात्कार गरेको अभियोगमा ठाकुरबाबा नगरपालिका–१ भुरिगाउँ बस्ने १७ वर्षीय किशोरलाई बिहीबार दिउँसो प्रहरीले पक्राउ गरेको छ ।
किशोरले ती किशोरीलाई सोही नगरपालिका–३ गोदानास्थित घरमा लागि जबरजस्ती करणी गरेको भन्ने उजुरीको आधारमा ईलाका प्रहरी कार्यालय भुरीगाउँबाट खटिएको प्रहरीले ती किशोरलाई पक्राउ गरेको हो ।
साथै, पीडितलाई ललाई फकाई गर्ने ठाकुरबाबा नगरपालिका–१ भुरिगाउँ बस्ने २९ वर्षीय अतल बहादुर थारूलाई समेत प्रहरीले आवश्यक अनुसन्धानको लागि नियन्त्रणमा लिएको छ ।
प्रकाशित मिति : २६ आश्विन २०८०, शुक्रबार ३ : ५१ बजे
प्रतिक्रिया