काठमाडौं । काठमाडौं महानगरपालिकाले महानगरभित्रका सामुदायिक विद्यालयमा पठन पाठन भए नभएको अनुगमन गर्न नगरप्रहरी खटाएको छ ।
प्रस्तावित शिक्षा विधेयकविरुद्ध सडक आन्दोलनमा उत्रिएका देशैभरीका शिक्षकहरूलाई साथ दिन काठमाडौँ महानगरपालिका भित्रका शिक्षकहरू पनि विद्यालय बन्द गरेर आन्दोलनमा गएका थिए ।
विद्यालयमा पठन पाठन प्रभावित नगर्न महानगरपालिकाले आग्रह गरेको थियो । विद्यालय बन्द गरेर आन्दोलनमा जाने विद्यालयका प्रअ र शिक्षकहरूलाई महानगरले कारबाहीको चेतावनी दिएको थियो ।
महानगरप्रमुख बालेन्द्र शाहको निर्देशनमा नगरप्रहरी प्रमुख राजु पाण्डेले ८९ वटा सामुदायिक विद्यालयमा आजै पुगेर अनुगमन गरिने बताए । नगरप्रहरीका थुप्रै टोलीहरू परिचालन गरिएको उनले जानकारी दिए ।
नियमित पठनपाठन नभएका विद्यालयहरूलाई महानगरको शिक्षा विभागले कारबाही गर्ने उनको भनाइ छ ।
तर शिक्षक महासङ्घले विज्ञप्ति नै जारी गरेर महानगरको निर्देशनलाई नमान्ने जनाइसकेको छ । महानगरभित्रका अधिकांश सामुदायिक विद्यालय बन्द गरेर शिक्षकहरू आज पनि आन्दोलनमा होमिएका छन् ।
प्रकाशित मिति : ४ आश्विन २०८०, बिहिबार १ : १९ बजे
प्रतिक्रिया