बनेपा । जिल्लामा फुटबल खेलको विकासका लागि क्रियाशील दुई वटा क्लबको सहकार्यमा बनेपामा फुटबल एकेडेमी स्थापना गरिएको छ ।
बनेपा फुटबल क्लब र माउन्ट एभरेष्ट क्लबको सहकार्यमा बनेपा फुटबल एकेडेमी स्थापना गरिएको हो ।
एकेडेमी स्थापनासँगै यसले ७ वर्षदेखि १७ बर्षसम्मका बालबालिकालाई फुटबलको प्रशिक्षणसमेत दिन सुरु गरिसकेको छ । एकेडेमीले अहिले ६० जना बालबालिकालाई बनेपा पोलिटेक्निकको मैदानमा फुटबल प्रशिक्षण दिइरहेको छ ।
काभ्रे जिल्ला फुटबल सङ्घसँगको सहकार्यमा स्थापना गरिएको एकेडेमीको अध्यक्षमा निरोज शाक्य, उपाध्यक्षमा मनिष भोछिभोया, सचिवमा सागर मानन्धर र कोषाध्यक्षमा कञ्चन नापित रहनुभएको छ । छन् ।
यस्तै सदस्यहरूमा रसिला जर्घामगर, अनिश लामा र राहुल श्रेष्ठ रहेका छन् भने सल्लाहकारमा बागमती प्रदेश फुटबल संघका अध्यक्ष निरोज श्रेष्ठ र एन्फाका केन्द्रीय सदस्य एवं जिल्ला फुटबल संघ काभ्रेका अध्यक्ष विकास नारायण श्रेष्ठ रहनुभएको छ ।
एकेडेमीले पत्रकारहरू विनोद न्यौपाने र केशवराज पौडेललाई पत्रकारिता क्षेत्रबाट सदस्यमा मनोनीत गरेको छ ।
बालबालिकालाई सानै उमेरदेखि फुटबल खेलप्रति आकर्षित गर्दै प्रशिक्षण दिने र उमेर समूहदेखि सिनियर राष्ट्रिय टिमसम्मका लागि उत्कृष्ट खेलाडी उत्पादन गर्ने लक्ष्यसहित एकेडेमी स्थापना गरिएको उपाध्यक्ष मनिष भोछिभोयाले जानकारी दिनुभयो ।
उहाँका अनुसार अहिले एकेडेमीमा जिल्लाभरका बालबालिकाहरू प्रशिक्षणका लागि सहभागी भएका छन् । एकेडेमीले निकेश नापितलाई प्रशिक्षकको रुपमा नियुक्त गरेको छ ।
प्रकाशित मिति : २० श्रावण २०८०, शनिबार १ : २३ बजे
प्रतिक्रिया