मर्स्याङ्दीमा खादा प्रयोगमा रोक, फूलको माला प्रयोगमा जोड

लमजुङ । लमजुङको मर्स्याङ्दी गाउँपालिकाले सार्वजनिक कार्यक्रमहरूमा खादाको प्रयोगमा पूर्ण प्रतिबन्ध लगाएको छ ।  

असोज ३ गते बसेको गाउँ कार्यपालिकाको बैठकले सरकारी तथा सार्वजनिक सभा, सम्मेलन तथा कार्यक्रममा खादा प्रयोगमा पूर्ण प्रतिबन्ध लगाउने निर्णय गरेको हो ।

स्थानीय उत्पादित बस्तु तथा सेवाको प्रवर्द्धन, विविधीकरण तथा बजारीकरण र वातावरणीय प्रभाव न्यूनीकरण गर्ने उद्देश्यले पालिकाभित्र खादाको प्रयोगमा प्रतिबन्ध लगाइएको गाउँपालिकाका अध्यक्ष अर्जुन गुरुङले बताउनुभयो । तर, अति आवश्यक धार्मिक कार्यक्रममा भने प्रयोगमा छुट दिइने उहाँले बताउनुभयो । 

पालिकाले स्थानीय स्तरमा उत्पादित फूलको प्रयोग गरी यसको बिक्री वितरण तथा बजारीकरण गरी आयआर्जन वृद्धि र स्थानीय उत्पादनमा प्रोत्साहन गर्ने निर्णय समेत गरेको छ । 

पालिका अध्यक्ष गुरुङले असोज ९ गते सार्वजनिक सूचना जारी गर्दै निर्णय कार्यान्वयन गर्न सरोकारवाला सबैमा अपिल समेत गर्नुभएको छ । 

गाउँपालिकाको यस्तो निर्णयले फूल व्यवसायमा लागेका कृषकहरू खुसी भएका छन् । पालिकाको वडा नम्बर ९ स्थित भालमचौर मृचे नमुना कृषि फार्ममा १० रोपनी र मर्स्याङ्दी कृषि फार्ममा तीन रोपनी क्षेत्रफलमा सयपत्री फूल खेती गरिएको छ । सो फार्मका प्रवर्द्धक नवीनराज कुइँकेलले बाह्रै महिना उत्पादन हुने गरी फूल खेती गरिएको बताउनुभयो ।

गत वर्षबाट सुरु गरिएको फूल खेतीले राम्रो बजार लिएको र माग पनि बढेको सो फार्मले बताएको छ । फार्मबाट यस वर्ष फूल तथा माला विक्री सुरु भइसकेको छ ।

स्थानीय फूल र माला प्रयोग गरी खादाको आयात रोक्न सकेमा स्थानीय पुँजीको संचिति हुनुको साथै आयआर्जनमा टेवा पुग्ने विश्वास लिएको गाउँपालिका अध्यक्ष गुरुङले बताउनुभयो ।

प्रकाशित मिति : १० आश्विन २०७९, सोमबार  ८ : ०८ बजे