मार्क्सवाद

कोही छन् अधिभूतवादतिर क्वै विज्ञानभन्दा पर,
क्वै भन्छन् चिज छैन भौतिक कतै अध्यात्मभन्दा पर,
कोही छन् जडसूत्रवादतिर क्वै  छ्न् भाववादी तर,
हो यो भौतिक वा पदार्थ–गतिको विज्ञान पढ्ने घर ।

यो संसार गति–स्थिति–प्रलय वा संसृष्टिमा द्वन्द्व छ,
छन् सारा गतिशील विश्व दुनियाँ संवृत्तिमा द्वन्द्व छ ।
जे जे छन् विपरीत तत्व तिनको एकत्वमा द्वन्द्व छ ।
छैनन् क्यै निरपेक्ष छन् जति जहाँ सापेक्षमा द्वन्द्व छ ।

यो पृथ्वी अथवा समाज कसरी ल्यायो, यहाँसम्म को ?
सारा सृष्टि भयो विकास कसरी आफै कि कर्ता छ को ?
जे जे छन् इतिहास बुझ्न भर यो विज्ञानमा पर्दछ ।
राखी भौतिकवाद दृष्टि यसले हेर्ने कुरा गर्दछ ।

होस् थाहा अतिरिक्तमूल्य कसरी कुम्ल्याउँछन् शोषक,
होस् थाहा कि त धर्मभित्र कसरी मान्छे भुले नाहक,
यो द्वन्द्वात्मकवाद बढ्छ सबमा फैलाउँदै चेतना,
गर्दै क्रान्ति सुनाउँदै दशदिशा विद्रोहको गर्जना ।

(रचनाकार प्रगतिशील लेखक संघ, रुपन्देहीका अध्यक्ष हुनुहुन्छ ।)
 

प्रकाशित मिति : ११ भाद्र २०७९, शनिबार  ९ : १९ बजे