एमाले स्कुल विभागको पहिलो समूहको प्रशिक्षण सम्पन्न, आजबाट दोस्रो कक्षा सञ्चालन

काठमाडौँ । नेकपा (एमाले) केन्द्रीय स्कुल विभागले सुरु गरेको कार्यकर्ताका लागि पार्टी स्कुल (विषयगत प्रशिक्षण) पहिलो समूहको प्रशिक्षण सम्पन्न भएको छ ।  

पार्टीका उपमहासचिव तथा विभागका प्रमुख प्रदीप ज्ञवालीले शनिवार पार्टी कार्यालय च्यासलमा कक्षामा सहभागीहरूका विभिन्न  जिज्ञासाबारे स्पष्ट पार्दै पहिलो समूहको कक्षा समापन गर्नुभयो । उहाँले सहभागीहरूलाई प्रमाणपत्र वितरण समेत गर्नुभयो ।  

तीन दिने स्कुलको पहिलो समूहमा अखिल नेपाल किसान महासङ्घका सदस्यहरू सहभागी भएका थिए । 

उहाँहरूलाई महासचिव शङ्कर पोखरेलले पार्टीको मार्गदर्शक सिद्धान्त र जनताको बहुदलीय जनवाद विषयमा प्रशिक्षण दिनुभएको थियो भने उपमहासचिव तथा स्कुल विभाग प्रमुख ज्ञवालीले सिद्धान्त, कार्यक्रम र कार्यदिशा, स्थायी कमिटी सदस्य डा.राजन भट्टराईले कूटनीतिक सम्बन्ध र भूराजनीति, स्थायी कमिटी सदस्य खगराज अधिकारीले सङ्गठन निर्माण, व्यवस्थापन र परिचालन र स्थायी कमिटी सदस्य भानुभक्त ढकालले पार्टी र जनसङ्गठन बीचको अन्तरसम्बन्ध विषयमा प्रशिक्षण दिनुभएको स्कुल विभागका सचिव पेम्बा लामाले जानकारी दिनुभयो ।

त्यसैगरी, स्कुल विभाग उपप्रमुख पार्टीका पोलिटव्यूरो सदस्य ईश्वरी रिजालले मार्क्सवादी दर्शन र सामाजिक रूपान्तरण, केन्द्रीय सदस्य रमेश बडालले स्थानीय निर्वाचनको समीक्षा र आगामी निर्वाचनको तयारी, अखिल नेपाल किसान महासङ्घका अध्यक्ष डा. प्रेम दंगालले किसान महासङ्घ र आगामी दिशा, सूचना प्रविधि विज्ञ अस्गर अलीले सूचना प्रविधिको प्रयोग र विभागका सदस्य वाईपी आचार्यले सूचना, सञ्चार र प्रविधिका विषयमा प्रशिक्षण दिनुभएको स्कुल विभाग सचिव लामाले बताउनुभयो ।

आजदेखि राष्ट्रिय युवा सङ्घका युवाका लागि स्कुल सञ्चालन भइसकेको पनि उहाँले बताउनुभयो ।

प्रशिक्षणको प्रभावकारिता कस्तो रह्यो भन्ने जान्नका लागि सहभागीहरूलाई स्कुल सुरु गर्नुअघि र स्कुल सकिएपछि विभिन्न प्रश्नावली वितरण गरी जाँच लिइएको थियो । 

स्कुलमा सहभागी किसान महासङ्घका सचिव सरिता गिरी यादवले प्रशिक्षणबारे आफ्नो अनुभव सुनाउँदै यति गहन र महत्त्वपूर्ण प्रशिक्षण आफ्नो २०/२५ वर्षको राजनीतिक जीवनमा नपाएको बताउनुभयो । उहाँले यस्ता प्रशिक्षण पार्टी राजनीतिमा आउँदै गरेका युवालाई अति महत्त्वपूर्ण हुने र त्यो तहसम्म विस्तार गर्नुपर्ने सुझाव दिनुभयो । 

प्रकाशित मिति : ५ भाद्र २०७९, आइतबार  १० : ०५ बजे